Аддзелам маркетынгу і бібліятэказнаўчай работы Магілёўскай абласной бібліятэкі выдадзены першы нумар за 2009 год інфармацыйна-аналітычнага бюлетэня "Веснік бібліятэк".
З 2003 года часопіс на сваіх старонках адлюстроўвае бібліятэчнае жыццё Магілёўшчыны. Дадзены выпуск прысвечаны рабоце бібліятэк у рамках Года роднай зямлі, якім абвешчаны у Рэспубліцы Беларусь 2009 год. Велічнаму подзвігу – 65-годдзю вызвалення Беларусі ад фашысцкай навалы – прысвечаны мерапрыемствы абласной бібліятэкі, якія адлюстраваны ў рубрыцы "Абласная дзень за днём".
Рабоце бібліятэк вобласці па захаванню гістарычнай спадчыны, выхаванню ў дзяцей і моладзі павагі і любові да Айчыны прысвечаны артыкулы "Библиотеки в системе социальной адаптации, духовного воспитания и интеллектуального развития детей", "Наведаеш бібліятэку – пазнаеш свет".
У маі бягучага года ў бібліятэчным жыцці рэспублікі адбылася знамянальная падзея – Форум бібліятэкараў Беларусі "Гуманітарна-асветніцкая дзейнасць бібліятэк у кантэксце агульначалавечых каштоўнасцей і беларускай дзяржаўнасці". У яго рабоце прыняла ўдзел загадчык аддзела аўтаматызацыі Магілёўскай абласной бібліятэкі В. Пятрэня. У бюлетэні змешчаны яе даклад аб рэалізацыі праекта па стварэнню паўнатэкставай электроннай базы даных па гісторыі і сучаснаму стану Магілёўскай вобласці "Край мой – Магілёўшчына".
Для замацавання традыцыі знаёмства з бібліятэчнымі сеткамі вобласці ў выпуску змешчаны матэрыялы пра дзейнасць УК "ЦБС г. Бабруйска". Публічныя бібліятэкі Бабруйска напрацавалі цікавы вопыт работы з моладдзю і, дзякуючы намаганням бібліятэчных работнікаў, з’яўляюцца для падрастаючага пакалення месцамі сапраўднага адпачынку, натхнення і творчасці.
Крыніца: Магілёўская абласная бібліятэка
