Калі пералічваюць вядомых пісьменнікаў, якія нарадзіліся на Уздзеншчыне, – сярод першых называюць Кандрата Крапіву. Сапраўды, кожны з нас лёгка прыгадае хоць бы некалькі п’ес, баек, працытуе радкі.
Прапраўнук Глеб і ўнучка Алена ў вёсцы Нізок.
Здаецца, усё ўжо даўно занатавана і вывучана, што датычыцца біяграфіі класіка. Але яго прапраўнук Глеб Александровіч (вучань мінскай гімназіі № 23) па-свойму прадоўжыў вывучаць спадчыну знакамітага продка.
“Мінскія адрасы Кандрата Крапівы” – так назваў хлопец сваю навукова-даследчую работу. Ён удакладніў, у які час і дзе пражываў у сталіцы Кандрат Крапіва, з якімі справамі, творчымі пошукамі быў звязаны кожны з гэтых перыядаў жыцця пісьменніка. Навуковым кіраўніком юнага даследчыка стала ўнучка Кандрата Крапівы – кандыдат мастацтвазнаўства Алена Атраховіч.
На гэтым месцы ў вёсцы Нізок стаяла хата, дзе нарадзіўся Кандрат Крапіва.
Днямі яны разам наведалі вёску Нізок Уздзенскага раёна – малую радзіму Кандрата Крапівы. Хата, дзе нарадзіўся будучы класік, зразумела, да нашых дзён не захавалася. Але месца, на якім яна стаяла, тут ведае кожны.
Сваю навукова-даследчую работу Глеб перадаў у літаратурны музей Кандрата Крапівы Уздзенскай сярэдняй школы № 2 (там у фондах захоўваецца 250 рэдкіх экспанатаў). Алена Атраховіч падарыла копіі архіўных дакументаў, кнігі Кандрата Крапівы, малюнкі мастака Анатоля Александровіча да зборніка твораў класіка.
Рабочы стол пісьменніка ў экспазіцыі краязнаўчага музея Узды.
У раённым музеі захоўваецца рэдкі скульптурны партрэт народнага пісьменніка БССР Кандрата Крапівы, які народны мастак БССР Заір Азгур стварыў з адпаведным для абодвух класікаў добразычлівым гумарам.
Падарункам для музея стала і калекцыя фотаздымкаў, якую даслала газета «Звязда». Фатаграфіі расказваюць, як герояў баек вядомага пісьменніка адлюстроўваюць юныя мастакі, скульптары, майстры дэкаратыўна-прыкладнога мастацтва.
Аўтар публікацыі: Яўген Пясецкі.
Крыніца: Звязда