У Мсціслаўскім райсавеце адзначылі, што цэнтральная плошча перад райвыканкамам назвы дагэтуль не мела, але на ёй стаіць помнік беларускаму друкару Пятру Мсціслаўцу.
“Таму райсавет і зацвердзіў назву плошчы, як плошча імя Пятра Мсціслаўца. Гэта знакавая гістарычная асоба не толькі для Мсціслава, але для ўсёй Беларусі”, – паведаміў старшыня райсавета Святаслаў Кусаў.
Паводле суразмоўцы, у гістарычнай частцы горада будуць пераназваны дзве вуліцы. Адной з іх, што каля Кармеліцкага касцёла, вернуць назву – Кармеліцкая. Яшчэ адну, якая насіла імя Урыцкага, назавуць Пірагоўская.
Святаслаў Кусаў удакладніў, што пакуль гістарычныя назвы вернуць толькі часткам вуліц у старым горадзе. Канчаткова імя Урыцкага з карты горада яшчэ не знікне.
“Мсціслаў вельмі старажытны горад. І як ёсць, напрыклад, у Таліне – стары Талін, а ў Мінску – стары Мінск, дык чаму б не быць і старому Мсціславу. Увекавечванне імя Мсціслаўца і вяртанне гістарычных назваў вуліц адбываецца не толькі ў межах падрыхтоўкі горада да Дажынак. Гэта адзін з крокаў па наданні гораду статусу горад-музей пад адкрытым небам”, – адзначыў Святаслаў Кусаў.
Пётр Мсціславец разам з Іванам Фёдаравым (Федаровічам) заснаваў у 1564 годзе ў Маскоўскім княстве друкарню і выдаў у ёй першую ў Масковіі друкаваную кнігу “Апостал”. Падзякі, аднак, не дачакаўся. Разам з Фёдаравым вымушаны быў ратавацца ўцёкамі на радзіму – у Вялікае Княства Літоўскае. Тут ён заснаваў новую друкарню і працягнуў справу Скарыны.
Старшыня Таварыства беларускай мовы Алег Трусаў вітае рашэнне мсціслаўскіх улад па ўвекавечванні імя Пятра Мсціслаўца: “Іх у Маскве ледзьве не забілі, і калі ён разам з Фёдаравым уцёк у Вялікае Княства, яны ўдваіх шмат чаго беларускага надрукавалі. Таму яны нашы патрыёты. Мсціславец і Фёдараў, ён жа Федаровіч, сябры і яны абодва з Беларусі”, – даводзіў Алег Трусаў.
Як згадвае Алег Трусаў, помнік Пятру Мсціслаўцу паставілі замест помніка Леніну: “Яго адкрылі на Дзень беларускага пісьменства і друку. Такім чынам у горадзе стала два помнікі друкару. Адзін напаўлегальна мы паставілі яшчэ ў савецкі час. Помнік гэты стаіць пад Езуіцкім касцёлам і аформлены ён як садова-паркавая фігура. У час, калі ставілі першы помнік, Мсціславам кіраваў дужа прагрэсіўны старшыня райкама партыі Катушкін. Ён шмат чаго дазваляў беларускага рабіць у Мсціславе”.
Неўзабаве Мсціслаў прыме абласны фестываль працаўнікоў сяла “Дажынкі-2016”.
Аўтар публікацыі: Алесь Асіпцоў.
Крыніца: Naviny.by
Чытайце таксама: