У выдавецтве Koska падрыхтавалі да выхаду адразу дзве кнігі шведскіх пісьменнікаў Юі і Тумаса Вісландэраў пра прыгоды каровы Мамы Му і яе сябра Крумкача. Кнігі з’явяцца ў продажы 6 лютага: выхад прымеркаваны да Мінскага кніжнага кірмаша.
Што за кнігі?
Неўзабаве выходзяць апошнія дзве кнігі з серыі пра Маму Му, якія яшчэ не выходзілі па-беларуску: “Мама Му на санках” і “Мама Му на горцы”. Ілюстрацыі ад пісьменніка і мастака Свэна Нурдквіста, пераклад зрабіла Надзея Кандрусевіч.
“Мама Му на санках” – зімовая гісторыя пра тое, як Мама Му хоча паспрабаваць з’ехаць з гары на санках, бо яна бачыла, як весела дзецям куляцца ў снезе. Аднак яе сябар Крумкач лічыць, што каровы не катаюцца на санках, а ў снезе можна пакуляцца і без іх.
“Мама Му на горцы” – летняя гісторыя пра прыгоды Мамы Му і яе сябра Крумкача на возеры. Гэтым разам Мама Му спрабуе з’ехаць з горкі ў ваду, але раптам горка выгінаецца, і дзеці не змогуць больш на ёй катацца. Крумкач спрабуе прыдумаць цэлы план, як адрамантаваць горку, але Мама Му робіць нешта, чаго Крумкач зусім не чакае.
Крыніца: CityDog