Сёння, у 90-ты дзень нараджэння народнага пісьменніка Беларусі Васіля Быкава, дзверы для наведвальнікаў расчыніць філіял Дзяржаўнага музея гісторыі беларускай літаратуры – “Музей-дача Васіля Быкава”.
Ён размяшчаецца ў пасёлку Ждановічы-6 па адрасе: вуліца Вінаградная, 62.
Двухпавярховы дом агульнай плошчай 104 кв. м пісьменнік пабудаваў у 1984 годзе. Менавіта тут ён мог адпачываць ад гарадской мітусні, прымаць блізкіх сяброў, маляваць, займацца аўтамабілем у гаражы. Два гады таму ўдава Васіля Быкава Ірына Міхайлаўна перадала дачу ва ўласнасць дзяржавы. Было прынята рашэнне адкрыць тут музей.
– Гэты музей, як кажуць спецыялісты, максімальна мемарыяльны, – распавядае дырэктар Дзяржаўнага музея гісторыі беларускай літаратуры Лідзія Макарэвіч. – Мы захавалі ўсе прадметы, што былі ў доме пры жыцці Васіля Уладзіміравіча: ад мэблі да сувеніраў, мастацкіх работ, нават прадметаў побыту. Такое рашэнне падказалі нам музейшчыкі з Латвіі. Пад час адной з сустрэч яны распавядалі пра свае мемарыяльныя музеі і радаваліся, што іх папярэднікі пакінулі прастору максімальна нязменнай. Мы ж стараемся не дзеля ўдзячнасці з боку будучых калег, але для захавання памяці пра Васіля Быкава. А паколькі мы назвалі гэты дом “музеем-дачай”, то дадалі ў экспазіцыю яшчэ некаторыя матэрыялы. Яны паказваюць Васіля Быкава як чалавека, які вельмі любіў маляваць, а замест дзённікавых запісаў, ствараў дзённікі-малюнкі.
Быкаўскія карцінкі, накіды, зробленыя алоўкам у шматлікіх блакнотах, толькі крыху павялічаныя, аж да кастрычніка будуць экспанавацца ў музеі-дачы. Тут прадстаўлена тэматычная падборка работ, прысвечаных гэтаму асабліваму дому ў Ждановічах. У экспазіцыі змешчаны і многія малюнкі, звязаныя з аўтамабілем, а таксама работы, выкананыя алеем.
У музейную прастору ператварыўся і гараж пісьменніка. Цяпер тут можна пабачыць своеасаблівую карту дарог, на якой пазначаны асноўныя кропкі, дзе бываў Васіль Уладзіміравіч: яго родныя Бычкі, Гродна, Мінск, востраў Сахалін, дзе служыў пісьменнік, ЗША, куды ён прыязджаў пад час камандзіровак, Фінляндыя.
Сёлета “Музей-дача Васіля Быкава” будзе працаваць толькі да кастрычніка. Але наступнай вясной, калі пачнецца новы дачны сезон, дом Васіля Уладзіміравіча зноў запросіць у госці. Паводле задумкі, наведвальнікі пабачаць ужо крыху змененую экспазіцыю, што прыадкрые іншыя старонкі біяграфіі і творчасці Васіля Быкава.
Аўтар публікацыі: Марына Весялуха.
Крыніца: газета “Звязда”
Чытайце таксама:
- Долгая дорога домой
- Сувязны паміж мінулым і будучым
- Фильм «В тумане» во французском Лионе
- Савецкія цэнзары зрабілі 200 купюр у аповесці Васіля Быкава
- В музее показали паспорт Быкова и черновики юного Гилевича
- Виртуальная выставка, посвящённая памяти Василя Быкова
- И снова было воскресенье, как тогда, в 41-м
- Фильм «В тумане» в американском прокате
- Музей-дача Быкова просит поделиться экспонатами
- Выбрано 100 книг для внеклассного чтения
- Нашелся чемодан рукописей
- Класіка беларускай літаратуры ўпрыгожыла брэсцкія аўтобусы
- Китайские открытия белорусской литературы
- Пяць краін. Адзін Васіль Быкаў
- Экранизируются две повести Быкова
- 19 июня – день рождения Василя Быкова
