16 чэрвеня ў Дубайскім заліве для наведвальнікаў адчыніла дзверы новая бібліятэка. Па форме будынак нагадвае разгорнутую кнігу, якая ляжыць на традыцыйнай падстаўцы (ралі).

Будаўніцтва сяміпавярховага будынка Бібліятэкі Махамеда бен Рашыда абышлося ў 1 мільярд дырхамаў. У ім размясціліся бібліятэка, амфітэатр, сад і кафэ.

Наведвальнікам прадстаўлены шырокі выбар літаратуры рознай тэматыкі і жанраў, а таксама іншых носьбітаў інфармацыі. Фонды бібліятэкі размеркаваны па 9 тэматычных залах: “Агульная бібліятэка”, “Бібліятэка для моладзі”, “Дзіцячая бібліятэка”, “Бібліятэка карт і атласаў”, “Бібліятэка мультымедыя і мастацтваў”, “Бібліятэка дзелавых выданняў”, “Бібліятэка ААЭ”, “Бібліятэка перыядычных выданняў” і “Спецыяльныя калекцыі”.

Чытачы і даследчыкі атрымалі доступ больш чым да 1 мільёна друкаваных і электронных кніг на арабскай і замежных мовах. І гэта яшчэ не ўсё. У бібліятэцы таксама прадстаўлены каля 35 тыс. друкаваных і электронных газет з усяго свету, каля 500 рэдкіх выданняў, 6 мільёнаў навукова-даследчых работ, каля 73 тыс. музычных дакументаў, 75 тыс. відэазапісаў, каля 13 тыс. артыкулаў і больш за 5 тыс. прысвечаных гісторыі друкаваных і электронных часопісаў.

У Бібліятэцы Махамеда бен Рашыда прымяняюцца найноўшыя тэхналогіі штучнага інтэлекту: інтэграваная сістэма спалучае ў сабе аўтаматызаванае сховішча, электронны пошук кніг, інфакіёск з функцыяй самастойнай замовы, на запыты наведвальнікаў адказваюць разумныя робаты.

У садзе на дошцы гонару можна ўбачыць словы віцэ-прэзідэнта і прэм'ер-міністра ААЭ і кіраўніка Дубая яго высокасці Шэйха Мухамеда бен Рашыда Аль Мактума (Sheikh Mohammed bin Rashid Al Maktoum).