Магілеўская абласная бібліятэка запрашае здзейсніць захапляючае падарожжа па краінах і кантынентах не выходзячы з дому, а пазнаёміўшыся з выстаўкай “Свет разнастайнасці кулінарных прыхільнасцей народаў свету”.
У кожнага народа існуюць свае асаблівасці харчавання, якія склаліся гістарычна. Яны звязаны з геаграфічным становішчам краіны, яе эканомікай і гісторыяй, з народнымі традыцыямі і веравызнаннямі, але дзякуючы цеснаму супрацоўніцтву, культурным і межличностным сувязям, даўно адбыўся і працягваецца працэс запазычвання нацыянальных кухань.
Першы раздзел выстаўкі “Ад кастра да кухняў “хайтэк” пазнаёміць вас з гісторыяй кулінарыі, з кулінарнымі прыхільнасцямі нашых продкаў і гастранамічнымі вынаходкамі знакамітых людзей, раскажа пра сыры і віны свету, раздзельнае харчаванне і вегетарыянства…
Другі раздзел “Ад баршчу да бліноў з ікрой” прадстаўляе кухню трох брацкіх славянскіх народаў – рускага, беларускага і ўкраінскага. Кухня манастырская і купецкая, дапятроўская і праваслаўная запрашаюць за хлебасольны стол пакаштаваць украінскі боршч з галушкамі, беларускія дранікі, рускую медавуху…
Вытанчаная еўрапейская кухня прадстаўлена трэцім раздзелам – “Труфеля, равіёлі, паста, сасіскі…” – рамантычная французская кухня, нямецкая кухня для людзей з выдатным апетытам, яркая і сонечная кухня Балгарыі… Вы здзейсніце кулінарнае падарожжа па Еўропе з поўначы на поўдзень і атрымаеце асалоду ад самых цікавых страў.
Памятаеце словы салдата Сухава “Усход справа тонкая"? Менавіта так называецца чацвёрты раздзел выстаўкі, дзе вы трапіце ў буянства пахаў спецый і прыпраў усходняй кухні – індыйскай, арабскай, кітайскай і японскай.
На выстаўцы прадстаўлены кнігі і перыёдыка, альбомы і слоўнікі, даведнікі і энцыклапедыі, якія дапамогуць разабрацца ў акіяне кулінарыі і кулінарных прыхільнасцей народаў свету.
Выстаўка будзе дзейнічаць да 6 верасня.