17 чэрвеня ў Магілёўскай абласной бібліятэцы адбылася сустрэча з галоўным рэдактарам часопіса сатыры і гумару "Вожык" Юліяй Францаўнай Зарэцкай.
На сустрэчу завіталі члены Магілёўскага абласнога аддзялення Саюза пісьменнікаў Беларусі на чале з яго старшынёй У.У. Дуктавым, вядомы магілёўскі пісьменнік і даўні аўтар часопіса, былы старшыня Магілёўскага абласнога аддзялення пісьменнікаў І.А. Аношкін, а таксама чытачы бібліятэкі і бібліятэкары г. Магілёва.
Юлія Францаўна Зарэцкая паведаміла пра багатую гісторыю часопіса, які пачаў сваё існаванне ў ліпені 1941 года з газеты-плаката "Раздавім фашысцкую гадзіну". Звярнуўшы ўвагу на тое, што з 2-га паўгоддзя 2009 года часопіс будзе выходзіць як альманах (два разы на год аб’ёмам 96 старонак), падзялілася творчымі планамі рэдакцыі. Бібліятэцы і гасцям сустрэчы Юлія Францаўна падарыла чарговы нумар часопіса і народную паэму "Тарас на Парнасе", выдадзеную ў рэдакцыі.
Размова пра гумарыстычнае выданне не абышлася без гумару. Свае невялічкія гумарыстычныя творы прачыталі В. Кунцэвіч і С. Украінка, цікава расказалі гісторыю свайго супрацоўніцтва з часопісам І.А. Аношкін і В.І. Арцеёў.
Супрацоўнікі бібліятэкі прапанавалі да ўвагі прысутных падборку нумароў часопіса "Вожык" з 1976 года.