У музеі рэдкай кнігі Гомельскай абласной універсальнай бібліятэкі імя У.І. Леніна з 23 чэрвеня да 23 ліпеня ладзіцца выстаўка “Старадрукі гродзенскіх тыпаграфій XVIII стагоддзя”.
Выстаўка арганізавана ў рамках сумеснага праекта “Гісторыя беларускай кніжнасці” Гомельскай абласной бібліятэкі і Веткаўскага музея народнай творчасці.
Гродзенская казённая каралеўская тыпаграфія ўзнікла ў 1775 г. і праіснавала да 1802 г. Фактычным яе гаспадаром да 1785 г. быў вядомы магнат-рэфарматар Антоній Тызенгаўз, а пасля яго смерці – Ян Ясінскі.
У экспазіцыі прадстаўлены кнігі з гродзенскай тыпаграфіі, якія друкаваліся па заказах старавераў. Гэта важныя для іх старадрукі ідэалагічнага зместу: “Катэхізіс”(1783), “Кніга аб веры” (1785), а таксама “Кветнік” (1787) і “Кніга Кірылы Іерусалімскага” (1786).