17 верасня культурная грамадскасць будзе адзначаць 100-годдзе з дня нараджэння народнага паэта Беларусі Максіма Танка. Кампазітар Ларыса Сімаковіч зрабіла сваё музычнае прынашэнне класіку.
Літаральна днямі яна скончыла партытуру оперы-rondo “Люцыян Таполя” паводлеаднайменнай паэмы.
– Апошнім часам, – расказвае кампазітар, – у мяне склалася плённае супрацоўніцтва з Нацыянальным акадэмічным народным аркестрам Беларусі імя Іосіфа Жыновіча. Таму літаральна адразу пасля ранейшага падобнага праекта – мюзікла-прытчы “Апокрыф” паводле Максіма Багдановіча – атрымала прапанову напісаць штосьці паводле Максіма Танка. Я адразу ўзгадала гэтую паэму: яна не можа не натхняць!
– Тэма прызначэння мастака і мастацтва, як можна заўважыць, скразная ў вашай творчасці. Бо яе вы ўзнімалі і ў “Апокрыфе”, і пры звароце да “Сымона-музыкі” Якуба Коласа ў творы «“S-музыка”: сучасныя сцэны». “Люцыян Таполя” атрымаў жанравае вызначэнне – опера-rondo.
– Да оперы я далучыла тэрмін “rondo”, каб падкрэсліць, што тут ёсць своеасаблівы рэфрэн – вобраз, які пастаянна з’яўляецца на працягу твора. Яго няма ў Максіма Танка. Там згадваецца хіба мастацкая праўда, якой і прытрымліваецца разьбяр Таполя, калі робіць Багародзіцу падобнай на дзяўчыну Тэклю, што выклікае гнеў біскупа. У мяне ж – дзве праўды: Хадзячая, на аснове якой і будуецца форма ронда, і Голая, што атрымае харэаграфічнае ўвасабленне. Можа, самі назвы патрабуюць удакладнення, але музычныя вобразы ўвогуле бывае цяжка азначыць словамі.
– Калі ж мы пачуем і ўбачым новы твор?
– Дата прэм’еры яшчэ не вызначана, але дакладна – сёлета. Працягласць – больш за гадзіну. У аднаго толькі Таполі – чатыры арыі, столькі ж – у Тэклі. Вялікая роля надаецца хору, які ўвасабляе і свецкае, і рэлігійнае атачэнне. У мяне, як заўсёды, шмат рэжысёрскіх і харэаграфічных прыдумак, якія сыходзяць з музычнай ідэі. Засталося дачакацца рэпетыцый!..
Аўтар: Надзея Бунцэвіч
Крыніца: газета “Культура”
Чытайце таксама:
- Аўтапартрэт на фоне класіка
- Кітайскі перакладчык малюе беларускіх класікаў
- Бай, лірнік, бай!
- Конкурс на создание памятника-бюста М. Танку
- В Молдове пройдут вечера памяти белорусских поэтов, писателей и музыкантов
- Персанальнай энцыклапедыі "Максім Танк" – быць!
- Планируется открыть Центр белорусской литературы им. М. Танка
- Да 100-годдзя з дня нараджэння Максіма Танка
- Столетие Максима Танка широко отпразднуют в Беларуси
- Век паэта
- Неизвестные автографы Максима Танка