5 верасня гэтага года ў г. Хойнікі Гомельскай вобласці ў рамках правядзення Дня беларускага пісьменства стартуе рэспубліканская акцыя “Чытаем па-беларуску”.
Ініцыятары і арганізатары акцыі – рэдакцыі часопісаў “Бярозка” і “Бібліятэка прапануе”.
Асноўная мэта акцыі – стымуляванне цікавасці жыхароў Беларусі да беларускамоўнай літаратуры, павышэнне ролі мастацкай кнігі ў культурным жыцці краіны.
У межах акцыі плануецца правесці сустрэчы з пісьменнікамі, майстар-класы, выступленні арганізатараў акцыі на радыё і тэлебачанні, а ў красавіку 2011 года – арганізаваць у Мінску сустрэчу актыўных удзельнікаў акцыі для абмеркавання сітуацыі з чытаннем беларускамоўнай кнігі, куды будуць запрошаны пісьменнікі, выдаўцы, прадстаўнікі Міністэрства інфармацыі, Міністэрства культуры, Міністэрства адукацыі, Нацыянальнай бібліятэкі Беларусі.
Акцыя прадугледжвае аказанне бібліятэкам – актыўным удзельнікам дапамогі ў камплектаванні, у тым ліку ўручэнне бібліятэчак кніг беларускіх пісьменнікаў з аўтографамі.
Запрашаем бібліятэкараў усіх сістэм і ведамстваў, кіраўнікоў і метадыстаў гарадскіх і раённых устаноў культуры і адукацыі, выдаўцоў і пісьменнікаў, настаўнікаў і вучняў прыняць удзел у акцыі. Чытаем па-беларуску разам!
Крыніца: Міністэрства інфармацыі Рэспублікі Беларусь
У Нацыянальнай бібліятэцы Беларусі да Дня беларускай пісьменнасці і Дня ведаў арганізавана кніжная выстаўка "Славутыя імёны Бацькаўшчыны".