ГалоўнаяНавіныНавіны бібліятэк
6 аншлагаў і 1 200 кіламетраў – унікальны тур спектакля “Радзіва «Прудок»” па гарадах Беларусі
У Нацыянальнай бібліятэцы сустрэлі гасцей з Узбекістана

“Ракуцёўскае лета” Максіма Багдановіча

“Ракуцёўскае лета” Максіма Багдановіча
Іншыя навіны

28 ліпеня па старой добрай 35-гадовай традыцыі паэтычны фестываль “Ракуцёўскае лета – 2019” пад Маладзечна сабраў прыхільнікаў роднай культуры, паэзіі і проста аматараў адпачынку на свежым паветры.

Сотні людзей розных пакаленняў адчуваюць атмасферу месца, якое больш за стагоддзе таму стала лепшай старонкай у штодзённіку жыцця Багдановіча. Так пра гэта пісаў сам паэт. На свята з Санкт-Пецярбурга прыехала Маргарыта Пярова – нашчадак роду Лычкоўскіх, дзе гасцяваў Максім, а таксама нашчадкі класіка і яго сяброў – Антона і Івана Луцкевічаў.

Маргарыта Пярова.jpg

Каравай Маргарыце Пяровай – нашчадку сям’і Лычкоўскіх, дзе гасцяваў Максім

Вярнуўшыся ў 1911 годзе з Яраслаўля на радзіму, 19-гадовы Максім Багдановіч два месяцы правёў у шляхцічаў Лычкоўскіх каля Краснага Сяла. Прыезд Багдановіча на Ракуцёўшчыну стаў першым дарослым знаёмствам з Беларуссю. Акружаны з усіх бакоў глухімі барамі, забыты, здавалася б, самім Богам, гэты маёнтак стаў для маладога паэта сімвалам роднага краю. Кранала душу тут усё: і беларуская мова, і ўклад жыцця. Была тут і жанчына, маладая пляменніца гаспадыні, усмешка якой дарыла хвораму і вельмі адзінокаму Максіму надзею на доўгае жыццё. Ён адчуваў тут сябе шчаслівым. Свежае паветра, прагулкі, гасціннасць гаспадароў – усё ішло на карысць, тут радасна і глыбока дыхалася хвораму на сухоты паэту, шмат і лёгка стваралася.

Менавіта на Ракуцёўшчыне адбыўся творчы ўзлёт Максіма. Тут за кароткі час ён напісаў свае лепшыя творы – цыклы вершаў “Старая Беларусь” і “Места”, паэмы “Вераніка” і “У вёсцы”. Пасля ракуцёўскага лета крытыкі назавуць Багдановіча песняром чыстай прыгажосці, а яго паэзію – царствам зачараваных люстэрак.

Ужо 25 гадоў як на Ракуцёўшчыне створаны музей Максіма Багдановіча “Фальварак Ракуцёўшчына”. Тут на свае вочы можна ўбачыць дом гаспадара, што ласкава прымаў паэта з берагоў Волгі, зазірнуць у гумно і наталіць смагу з крыніцы «жывой вады», пра якую некалі напісаў Максім:

У родным краі ёсць крынiца жывой вады. 
Там толькi я змагу пазбыцца сваёй нуды…

Вольга Дашкоўская.jpg

Вольга Дашкоўская – унучатая пляменніца Багдановіча

Экспанаты ў музеі пераважна знаёмяць з жыццём былога гаспадара Вацлава Лычкоўскага – роднага дзядзькі Антона і Івана Луцкевічаў, распавядаюць пра Эмілію Шабуню і яе маленькую дачку Яніну, якія былі побач з Максімам два летнія месяцы і пакінулі ўспаміны пра маладога паэта. Час ідзе хутка, і першыя наведвальнікі музейнага комплексу таксама сталі сведкамі гісторыі.

Праграма фэсту, як заўсёды, адзначылася яркасцю і насычанасцю. Не прывык працаваць інакш галоўны арганізатар свята – дзяржаўны музей Максіма Багдановіча, яго супрацоўнікі Міхась Бараноўскі, Валянціна Кароткіна і іншыя. З самага ранку і да позняга вечара тут заняткаў хапала. На літаратурна-музычнай імпрэзе выступалі беларускія паэты Віктар Кажура, Бажэна Мацюк, Валерый Максімовіч, Марыя Кобец, спевакі Ігар Палынскі, Алесь Камоцкі, Раман Яраш, гурты “Гарадскі вал”, “Балцкі субстрат” і іншыя.

Ракуцёўскае лета Багдановіча параўноўваюць з Болдзінскай восенню Пушкіна. Смерць маці і расстанне з Беларуссю для паэта былі самымі трывожнымі ранамі, менавіта таму прыезд на Ракуцёўшчыну – найпрыемнейшы час. А творчы плён толькі даказвае, як на чалавека ўплывае яго радзіма.

Крыніца: СБ – Беларусь сегодня

Каментарыі карыстальнікаў:

Каментаванне даступна толькі зарэгістраваным карыстальнікам

Навіны

Віртуальная экскурсія ў аздараўленчым лагеры “Палітэхнік”

16 Жні 2019

15 і 16 жніўня ў аздараўленчым лагеры “Палітэхнік”, размешчаным у маляўнічым кутку Мінскага раёна, адбылася выязная віртуальная экскурсія з цыкла “Славутыя імёны Бацькаўшчыны”.

Навіны Нацыянальнай бібліятэкі Беларусі

Рэсурсы віртуальнай чытальнай залы НББ для даследчыкаў-стажораў з Рэспублікі Узбекістан

14 Жні 2019

9 жніўня ў Беларускім дзяржаўным педагагічным універсітэце адбылася прэзентацыя рэсурсаў віртуальнай чытальнай залы Нацыянальнай бібліятэкі Беларусі (НББ) для даследчыкаў-стажораў з Рэспублікі Узбекістан.

Навіны Нацыянальнай бібліятэкі Беларусі

Золак над апошняй магiстраллю

13 Жні 2019

Усе ведаюць гэтую цудоўную песню на музыку Iгара Лучанка. На слыху i iншыя – “А мне ў шчасце верыцца”, “Беларусачка”, “Нарачаначка”, якiя там-сям успрымаюцца як народныя. Але ў гэтых песень ёсць аўтар – паэт Алесь Ставер, якому 10 жніўня споўнiлася б 90 гадоў.

Навіны бібліятэк

Паўлюк Трус: паэт крыштальнай чысціні

14 Жні 2019

“Здароў, Паўлюк!” – так пачынаецца ліст Алеся Дудара да Паўлюка Труса. Гэтае маладое заліхвацкае вітанне і цяпер найлепш пасуе да аднаго з самых выбітных паэтаў-маладнякоўцаў, якому напачатку мая грукнула 115 гадоў.

Навіны бібліятэк

111