21 лютага ў бібліятэках краіны адзначылі Міжнародны дзень роднай мовы.
Гэта свята заснавана рашэннем 30-й сесіі Генеральнай канферэнцыі ЮНЕСКА (1999 г.) з мэтай абароны моўнай і культурнай разнастайнасці і падтрымкі шырокага выкарыстання родных моў.
У абласным грамадска-культурным цэнтры г. Брэста прайшло свята роднай мовы “Жывыя вытокi”, прымеркаванае да Мiжнароднага дня роднай мовы i адкрыцця Года кнігі на Брэстчыне.
У рамках свята і ў сувязі з юбілеямі беларускіх класікаў Я. Купалы, Я. Коласа, М. Танка Брэсцкая абласная бібліятэка імя М. Горкага прэзентавала чатыры разгорнутыя выстаўкі літаратуры:
- “Літаратурная вяршыня”, дзе прадстаўлены кнігі, адзначаныя Дзяржаўнымі прэміямі і прэміяй Прэзідэнта Рэспублiкi Беларусь “За духоўнае адраджэнне”, а таксама кнігі – пераможцы літаратурных конкурсаў Беларусі;
- “Прарок нацыянальнага адраджэння” (да 130-годдзя з дня нараджэння Я. Купалы). На выстаўцы экспануюцца чатыры прыжыццёвыя выданні, шматтомнікі і асобныя працы класіка; літаратура, якая раскрывае актуальнасць і маштабнасць яго творчасці для сучаснай Беларусі; альбомы майстроў выяўленчага мастацтва, якія стваралі вобраз паэта, iлюстравалi яго паэтычныя творы;
- “Свайму часу і вечнасці” (да 130-годдзя з дня нараджэння Я. Коласа). Да ўвагі чытачоў прапануюцца дванаццаць прыжыццёвых выданняў класіка; шмат матэрыялаў пра яго жыццё і творчасць; значнае месца займаюць працы, якія раскрываюць сувязь Я. Коласа з Берасцейшчынай;
- “Летапісец эпохі” (да 100-годдзя з дня нараджэння М. Танка). На выстаўцы змешчаны факсімільнае выданне пісьменніка “На этапах” (1936 г.); зборнікі пасляваеннага перыяду, у тым ліку зборнік “У дарозе” з аўтографам М. Танка; літаратура, якая адлюстроўвае жыццёвы і творчы шлях класіка. Асобны раздзел выстаўкі – гэта вершы – прысвячэнні пісьменнікаў і паэтаў М. Танку.
З мэтай пашырэння сферы выкарыстання беларускай мовы ў жыцці грамадства, папулярызацыі беларускай літаратуры ў Магілёўскай абласной бібліятэцы імя У.І. Леніна разгорнуты кніжныя выстаўкі “Узрост мудрасці і сталасці” і “Мова – крыніца ўсёй прыгажосці”.
Кніжная экспазіцыя “Узрост мудрасці і сталасці” прысвечана 80-годдзю заснавання газеты “ЛіМ”.
З першых нумароў газеты адчувалася парадаксальнасць глыбінных плыняў перыяду першай пяцігодкі і 15-годдзя Кастрычніцкай рэвалюцыі, калі на яе старонках разам з афіцыйнымі матэрыяламі сустракаліся творы беларускіх пісьменнікаў, напрыклад, М. Зарэцкага “Вязьмо”, К. Чорнага “Бацькаўшчына” і інш.
У нашы дні газета “ЛіМ” захоплена культурным шматколерным жыццём краіны. ЛіМаўцы ўдала зберагаюць беларускае мастацкае слова, адлюстроўваюць на сваіх старонках навінкі кніжнага свету, даюць слова і маладым талентам. Акрамя матэрыялаў, прысвечаных гісторыі газеты, на выстаўцы прадстаўлена серыя “Лімаўскі фальварак” выдавецтва “ЛіМ” – мастацкія творы Я. Сіпакова, А. Жука, А. Казакова, В. Ткачова, М. Кунцэвіча, І. Карэнды, А. Паплаўскага і іншых аўтараў, а таксама артыкулы пра дзейнасць УК “Магілёўская абласная бібліятэка імя У.І. Леніна”.
Прадаўжае дзейнічаць кніжная экспазіцыя “Мова – крыніца ўсёй прыгажосці”, якая складаецца з раздзелаў “Карані нашай мовы”, “Вытокі кніжнага слова”, “Жывая мова Магілёўшчыны”, “Мова нашай дзяржавы”. Выстаўка асвятляе шматлікія аспекты роднай мовы. Прапанаваныя ўвазе дакументы суправаджаюцца кароткімі гістарычнымі даведкамі, выказваннямі і вершамі беларускіх пісьменнікаў пра беларускую мову, народнымі мудраслоўямі – прыказкамі.
Школьнікі малодшых класаў узялі ўдзел у акцыі “Гавары са мной па-беларуску”, у рамках якой праз літаратурную гульню “Старонкі з моўнай скарбонкі” адбылося знаёмства наведвальнікаў з беларускімі прыказкамі і прымаўкамі, загадкамі і прыкметамі, жартамі і лічылкамі.
А напярэдадні гэтай падзеі ў бібліятэцы прайшла прэзентацыя кніжнай выстаўкі “Мелодыя роднага слова”.
У раздзеле “Бяздоннае багацце” дэманстраваліся кнігі пра гісторыю культуры Беларусі, святы і абрады беларусаў, замкі і музеі. У раздзеле “Кнігі – юбіляры 2012” экспанаваліся вершы і апавяданні Я. Коласа, Я. Купалы, А. Куляшова, М. Танка, М. Чарота, М. Лынькова, Я. Маўра, В. Быкава, У. Караткевіча, У. Дубоўкі. У раздзеле “Шчодрае сэрца пісьменніка – дзецям” сучасныя беларускія пісьменнікі прадстаўлены ў серыі “Казкі ХХI стагоддзя”, прыгодніцкай літаратурай аўтараў: Н. Ігнаценка, Р. Баравіковай, А. Масла, У. Ліпскага, А. Карлюкевіча і інш.
Школьнікі малодшых класаў сталі ўдзельнікамі паэтычна-біяграфічнага падарожжа па творчасці беларускага паэта Ніла Гілевіча “Шчаслівыя хвіліны”.
Кніжная выстаўка “Мова народа – душа народа” для школьнікаў старшых класаў пазнаёміла з кнігамі па гісторыі беларускай мовы і культуры слова. Для падлеткаў бібліятэкары зрабілі падборку твораў класікаў беларускай літаратуры Я. Купалы, Я. Коласа, М. Багдановіча, таксама прапанавалі зборнікі вершаў, прыказак, прымавак, баек і інш.
Магілёўская Цэнтральная гарадская бібліятэка імя К. Маркса запрасіла ў гэты дзень усіх жадаючых на свята мовы. У фае гучалі вершы беларускіх паэтаў, дэманстраваліся цікавыя кніжныя выстаўкі, у лекцыйнай зале адбыўся паказ электроннай прэзентацыі новага выдання аповесці У. Караткевіча “Дзікае паляванне караля Стаха”. Затым свае дзверы адчыніла літаратурная гасцёўня “Пясняр чалавечай душы”, прысвечаная творчасці Янкі Купалы.
Чытайце таксама: