У 11 намінацыях XVІ Міжнароднага конкурсу краін – удзельніц Садружнасці Незалежных Дзяржаў «Мастацтва кнігі» беларускія выданні занялі восем першых, адно другое і адно трэцяе месца. Дзевяць кніг удастоены спецыяльных дыпломаў.
Гран-пры конкурсу атрымаў праект выдавецтва «Беларуская энцыклапедыя імя П. Броўкі» – персанальная энцыклапедыя «Янка Купала». Трохтомнае выданне падрыхтавана ў год святкавання 135-годдзя з дня нараджэння народнага паэта Беларусі. У агульнай складанасці над ёй працавалі больш за тысячу даследчыкаў, літаратуразнаўцаў і супрацоўнікаў выдавецтва. А кожны яе том складаецца з больш чым 400 старонак. У энцыклапедыі аналізуюцца ўсе творы Янкі Купалы, апісваюцца ўмовы іх падрыхтоўкі і гэтак далей. Жыццё і творчасць Янкі Купалы ад а да я – прыкладна так можна апісаць гэта выданне.
– Такога маштабнага праекта, які быў бы прысвечаны адной асобе, у гісторыі нашага кнігавыдання яшчэ не было, – удакладняе дырэктар выдавецтва Уладзімір Андрыевіч.
Энцыклапедыя «Янка Купала» – вялікі падарунак не толькі для беларусаў. Гэта значны інтэрнацыянальны праект, у якім распавядаецца аб краінах і гарадах, якія наведаў паэт, распавядаецца аб прадстаўніках замежжа, звязаных з творчасцю паэта, у прыватнасці, аб перакладчыках твораў Янкі Купалы на рускую, казахскую, грузінскую, балгарскую, татарскую і іншыя мовы.
Аўтар публікацыі: Людміла Мінкевіч.
Крыніца: СБ. Беларусь сегодня