Дзяржаўны літаратурна-мемарыяльны музей Янкі Купалы прэзентаваў каталог “Афішы да спектакля «Паўлінка» па аднайменнай п’есе Янкі Купалы”.
– Праца над каталогам вялася з 2011 года, – распавяла ўкладальніца Лізавета Еліневіч. – Распачаў яе Дзяніс Рашчынскі. Ён правёў першасны адбор афіш, іх атрыбуцыю і сістэматызацыю. Я ж займалася інфармацыйным насычэннем каталога, шукала артыкулы і ўспаміны, якія дапасоўваліся б да афіш. У фондах музея захоўваюцца публікацыі, ад пачатку ХХ стагоддзя да сучасных, звязаныя з Янкам Купалам. Яны надзвычай цікавыя.
У 1970-я гады, напрыклад, амаль не пісалі пра “Паўлінку”. А ў 2013-м, зразумела, было вельмі шмат матэрыялаў, як і ў 1913-м – годзе прэм’еры спектакля. Некаторыя артыкулы сёння падаюцца смешнымі. Іншыя прасякнутыя такой душэўнасцю, пяшчотай, што іх немагчыма было не прывесці ў каталогу. Мне здаецца, якраз гэтыя артыкулы і стварылі дух каталога, зрабіўшы яго не проста пералікам афіш за 100 гадоў.
Сапраўды, каталог – выданне ўнікальнае: тут адлюстравана сувязь паміж жыццём і творчасцю Янкі Купалы і развіццём Нацыянальнага акадэмічнага тэатра імя Янкі Купалы. І СМІ, і купалаўцы ўжо не раз адзначалі, што спектакль “Паўлінка” ў пэўным сэнсе рэкордны: нідзе ў свеце пастаноўка не жыве на адной сцэне больш за 70 гадоў. Каталог закранае дзейнасць не толькі Купалаўскага тэатра, але і Беларускага Акадэмічнага музычнага тэатра, дзе пэўны час ішла аперэта “Паўлінка”, шэрагу іншых тэатральных гурткоў і пад. Тут змешчана 39 афіш з усяго свету на розных мовах. Яны суправаджаюцца вытрымкамі з рэцэнзій, урыўкамі з успамінаў, здымкамі акцёраў у ролях са спектакля, выявамі тэатральных праграм. І кожная – не толькі крыніца інфармацыі, але і дакумент часу, а ў асобных выпадках – твор мастацтва. Так, на вокладцы каталога змешчаная афіша 1987 года мастака Уладзіміра Крукоўскага, якая захоўваецца ў фондах музея.
На прэзентацыі прысутнічалі прадстаўнікі Купалаўскага тэатра – мастацкі кіраўнік Мікалай Пінігін, загадчык літаратурна-драматычнай часткі Вольга Бабкова, актрыса Ала Долгая, якая выконвала ролю Паўлінкі цягам 18 гадоў, і іншыя акцёры; Беларускі Акадэмічны музычны тэатр прадстаўляла начальнік службы маркетынгу Вольга Гудожнікава. Прафесійны погляд на каталог выказала Вераніка Ярмалінская, аўтар рэцэнзіі на выданне, загадчык аддзела тэатральнага мастацтва Цэнтра даследаванняў беларускай культуры, мовы і літаратуры НАН Беларусі, кандыдат мастацтвазнаўства.
Аўтар публікацыі: Наста Грышчук.
Крыніца: газета “Літаратура і мастацтва”