Кніга Уладзіміра Арлова і Дзмітрыя Герасімовіча “Belarus.The Epoch of the Grand Duchy of Lithuania” ў перакладзе на англійскую мову вядомага брытанскага беларусіста Джыма Дынглі (Jim Dingley) з’явілася з друку ў Вільні пад грыфам выдавецтва Technalohija.
У арыгінале кніга “Краіна Беларусь. Вялікае Княства Літоўскае” выйшла шэсць гадоў таму і мела вялікі поспех не толькі ў Беларусі. Яна прысвечана найцікавейшай эпосе беларускай мінуўшчыны – часам Вялікага Княства Літоўскага, якое сваёй гістарычнай радзімай лічаць не толькі беларусы і літоўцы, але і ўкраінцы, а таксама беларускія татары і яўрэі-літвакі.
Беларускія землі адыгрывалі ў ВКЛ вызначальную ролю, а старабеларуская мова была дзяржаўнай. Менавіта таму кніга мае на мэце расказаць найперш пра дзяржаватворчую ролю беларусаў у гэтай магутнай еўрапейскай дзяржаве і дае англамоўнаму чытачу магчымасць даведацца пра гісторыю ВКЛ з беларускага боку.
“Belarus.The Epoch of the Grand Duchy of Lithuania” – займальны і даступны расповед пра палітыку і гаспадарку, жыццё і побыт, ваенныя перамогі і культурныя дасягненні “літвінаў” у “Літве”. Гэтыя назвы на працягу некалькіх стагоддзяў былі назвамі беларусаў і Беларусі, гісторыя якой разглядаецца ў кнізе як частка агульнаеўрапейскага руху цывілізацыі.
Паводле Уладзіміра Арлова, “гэта кніга пра тое, што беларусы гістарычна, ментальна – еўрапейскі народ. У нас еўрапейская гісторыя, і гэта пропуск у нашу еўрапейскую будучыню”.
Пад маляўнічай вокладкай “Belarus.The Epoch of the Grand Duchy of Lithuania” – каля 400 старонак гісторыі і прыкладна 2 тысячы ілюстрацый. Аздабленне выдання – заслуга мастака Дзмітрыя Герасімовіча. Для ілюстравання кнігі выкарыстаны мноства дакументаў, старых карт, летапісных мініяцюр і сярэднявечных гравюр, у тым ліку ўнікальныя ілюстрацыі з прыватных калекцый Аўстрыі, Германіі, Польшчы і Літвы.
Гэта сапраўдны даведнік па часах ВКЛ і не толькі. Аўтары вырашылі не абмяжоўвацца храналагічнымі межамі існавання ВКЛ: кніга пачынаецца матэрыяламі пра суіснаванне балтаў і славян на беларускіх землях, а завяршаецца аповедам пра сённяшняе жыццё беларусаў у Літве.
“Belarus.The Epoch of the Grand Duchy of Lithuania” – у пэўным сэнсе працяг першай гістарычнай англамоўнай кнігі Арлова і Герасімовіча, “This Country Called Belarus”, якая выйшла ў 2013 годзе накладам 3000 экзэмпляраў і знайшла ў свеце шмат удзячных чытачоў.
Крыніца: Новы час