22 студзеня на 82-м годзе жыцця памёр беларускі пісьменнік, публіцыст і грамадскі дзеяч Васіль Якавенка.
Васіль Цімафеевіч Якавенка нарадзіўся 5 мая 1936 года ў Светлагорскім раёне Гомельскай вобласці ў сялянскай сям'і.
У 1956 годзе скончыў Беларускі індустрыяльны тэхнікум па спецыяльнасці геолаг. У 1956–1958 гадах служыў у Савецкай Арміі. Працаваў майстрам, тэхнікам, інжынерам у розных геалагічных партыях і праектных інстытутах рэспублікі, рэдактарам на Беларускім радыё. У 1966 годзе завочна скончыў БДУ. У 1972–1977 гадах працаваў рэдактарам аддзела навукі і мастацтва, аддзела нарыса і публіцыстыкі часопіса “Полымя”. З 1977 года – член Саюза пісьменнікаў БССР і СССР. У 1977–1978 гадах – сакратар праўлення Саюза кінематаграфістаў БССР. З 1990 года – прэзідэнт Беларускага сацыяльна-экалагічнага саюза "Чарнобыль".
Нямала сіл і энергіі пісьменнік аддаў раскрыццю рэалій пры асвятленні наступстваў Чарнобыльскай катастрофы. У апошнія гады, будучы каардынатарам грамадзянскай ініцыятывы "Інстытут нацыянальнай памяці”, Васіль Якавенка засяродзіў сваю ўвагу на раскрыцці невядомых старонак сталінскіх рэпрэсій у Беларусі, “знайшоў” свайго дзеда Васіля, селяніна, арыштаванага і расстралянага ў 1938 годзе ў Мазыры, рэдагаваў грамадскі штомесячны бюлетэнь “Рэха ГУЛАГу” (2007). Затым, абапіраючыся на вядомых беларускіх навукоўцаў і творчую інтэлігенцыю, правёў шырокамаштабныя акцыі за адраджэнне і развіццё беларускай мовы (у 2009 і 2011 гадах).
Васіль Якавенка вядомы як аўтар гістарычнага рамана “Надлом”, трылогіі “Пакутны век”, кніг “Крушэнне на ростані”, “Другой зямлі не будзе”, “Прывіды Шанхаю над Свіслаччу”, а таксама многіх іншых.
Крыніца: Naviny.by
Калектыў Нацыянальнай бібліятэкі Беларусі выказвае шчырыя спачуванні родным і блізкім пісьменніка.