Сталічная дзіцячая бібліятэка № 1 распрацавала праект пад назвай “Пяньковыя цікавосці”.
Адмыслова для маленькіх аматараў літаратуры была зроблена незвычайная палічка-пянёк, на якой “растуць” кніжкі ў рознакаляровых торбачках. У праекце прапаноўвалася ўзяць удзел найбольш актыўным і зацікаўленым сем’ям. Знайшліся дзевяць.
Сутнасць праекта заключаецца ў зацікаўленні дзетак і іх бацькоў беларускай літаратурай для дашкольнікаў. Таму супрацоўнікамі бібліятэкі быў распрацаваны спіс літаратуры, прадстаўлены творамі як сучасных пісьменнікаў, так і класікаў.
Кнігі са спіса раскладваюцца па спецыяльных торбачках, якія развешваюцца на “чароўным пяньку”. Кожная торбачка належыць пэўнаму дзіцяці – удзельніку праекта, і пазнаць менавіта сваю можна дзякуючы каляровай картцы з малюнкам любімай жывёліны, прымацаванай да яе.
Хлопчыкі і дзяўчынкі падыходзяць да палічкі-пянька і дзякуючы малюнку адшукваюць сваю торбачку, у якой ужо ляжаць новыя, цікавыя і прыгожыя, кніжкі. Гэтую торбачку дзеткі бяруць дадому, а калі прыносяць здаць прачытанае, то бібліятэкары спяшаюцца зноў напоўніць яе цікавай і карыснай літаратурай.
Імкнучыся дапамагчы дзецям у спасціжэнні роднай мовы, прапануюць удзельнікам праекта далучыцца да абмеркавання прачытаных кніг. З кожным дзіцём праводзіцца індывідуальная гутарка, высвятляецца, што было цікава, а што не, якая кніжка была складанай, а якая прачыталася з лёгкасцю. Такім чынам бібліятэкары ствараюць своеасаблівую статыстыку, якая потым дапамагае ім у працы з беларускай кнігай.
Аўтар публікацыі: Кацярына Нарваткіна, бібліятэкар ІІ катэгорыі дзіцячай бібліятэкі № 1 г. Мінска.
Крыніца: газета “Літаратура і мастацтва”
