9 красавіка ў 5-й гарадской бібліятэцы ў межах Года моладзі адбылося адкрыццё фестывалю “Паэзія маладых”.
Старшыня Мінскага гарадскога аддзялення Саюза пісьменнікаў Беларусі, паэт, празаік Міхась Пазнякоў прадставіў кожнага маладога паэта, расказаў, лаўрэатамі якіх прэмій і конкурсаў яны з`яўляюцца, на старонках якіх беларускіх перыядычных выданняў друкуюцца, якія кнігі паэзіі выйшлі ў серыях “Мінскія маладыя галасы” і “Маладая паэзія Беларусі”.
З моладдзю навучальных устаноў Мінска, фарбамі паэтычнага слова размаўлялі Яна Явіч, Дар`я Лёсава, Маргарыта Латышкевіч, Кацярына Массэ, Аліна Карпіцкая, Ганна Мартынчык. Было шмат пытанняў пра творчасць, пра тое, што хвалюе сучасную моладзь, пра каханне. Ганаровы госць фестывалю, аўтар раманаў, аповесцей, пісьменнік, празаік, сцэнарыст Фёдар Рыгоравіч Конеў пажадаў творчых поспехаў кожнаму выступоўцу.
Фестываль будзе праходзіць у Мінску два месяцы. На розных пляцоўках горада выступяць самыя таленавітыя маладыя паэткі і паэты. Супрацоўнікі бібліятэкі падрыхтавалі да мерапрыемства кніжную выстаўку “Чараўніцтва паэтычнага слова: паэзія маладых”.
Крыніца: Цэнтралізаваная сістэма дзяржаўных публічных бібліятэк г. Мінска