ГалоўнаяНавіныНавіны бібліятэк
Семінар аб рэалізацыі палажэнняў Маракешскага дагавора
Музейныя заняткі “Добрыя казкі”

Падрыхтавана да друку кніга “Скарбы зямлі беларускай”

Падрыхтавана да друку кніга “Скарбы зямлі беларускай”
Іншыя навіны

У Выдавецкім доме “Звязда” падрыхтавана да друку кніга Лёлі Багдановіч “Скарбы зямлі беларускай”.

У аснове аўтарскіх казак, якія склалі зборнік, – легенды і паданні, прысвечаныя сімвалам нашай Айчыны. Бусел, хлеб, васількі, возера Нарач, Белавежская пушча, лён – вось няпоўны спіс тэм, якія натхнілі пісьменніцу на стварэнне кнігі. У займальнай форме падлеткам распавядаецца пра беларускую культуру і міфалогію, аўтар спрабуе дапамагчы спасцігнуць асновы нацыянальнай ментальнасці.

bagdanovich_skarby_zyamli_belaruskay_2.jpg

“Казка-прытча пра бусла”, “Легенда-прытча пра балота”, “Хлеб – над панамі пан”, “Казка-легенда пра васількі”, “Легенда пра возера Нарач”, “Казка-легенда пра пушчу”, “Лён – усяму душа”, “Казка-легенда пра зубра”, “Казка-легенда пра замкі”, “Легенда пра прыгажосць”, “Казка-легенда пра ежу”, “Казка-легенда пра вёску”, “Казка пра Вадзяніка” – у кожным з твораў сканцэнтравана асаблівая энергетыка. Пісьменніца Лёля Багдановіч спрабуе ўзвысіць спрадвечныя сімвалы зямлі беларускай, імкнецца надаць ім асаблівую маральную, духоўную вагу. У “Скарбах зямлі беларускай” размаўляюць звяры і птушкі, ажываюць пачварныя істоты – Вадзянік, Балотнік, Багнік, Аржавень, за гаспадара жыцця выступае Яго Вялікасць Хлеб.

bagdanovich_skarby_zyamli_belaruskay_3.jpg

Казкі Лёлі Багдановіч не перагружаны лішнімі падрабязнасцямі, аўтар выбірае галоўную, стрыжнёвую лінію – і згодна ёй даводзіць да чытача тую альбо іншую мастацкую ідэю. У адной з казак пакрыўджаным аказаўся хлеб: пан адшпурнуў кавалачак хлеба нагою пад стол... Але і хлеб можа за сябе пастаяць, і жыццё падказвае, што без яго ніяк не пражыць...

Бягуць слугі да пана, жаляцца.

– Не ведаем, што здарылася, паночку! – са слязамі на вачах дакладваюць. – Ніводнага зярнятка не засталося, ні крупіначкі, ні мукі жменькі! Нават не ўяўляем, з чаго страву гатаваць, чым коней карміць.

Успомніў тады пан, як ён з хлебам абышоўся. Палез пад стол. Дастаў той кавалачак...

bagdanovich_skarby_zyamli_belaruskay_4.jpg

Пісьменніца ўмела арганізоўвае дзеянне, робіць свае творы дынамічнымі. Часам нават складваецца ўражанне, што шмат якія з казак маглі б стаць асновай для тэатралізаваных пастановак на школьнай сцэне. Гэтаму меркаванню спрыяюць і граматна выбудаваныя дыялогі ў легендах, прытчах, казках. Сапраўднай п’есай уяўляецца “Казка-легенда пра васількі”, дзе галоўныя дзеючыя асобы – сыночак Васілёк і дачушка Васілінка...

Будзем спадзявацца, што кнігу Лёлі Багдановіч “Скарбы зямлі беларускай” заўважаць у школе, зробяць яе патрэбным дапаможнікам у выхаваўчай, пазакласнай працы. З дапамогай такіх твораў сапраўды можна выкладаць урокі патрыятызму.

bagdanovich_skarby_zyamli_belaruskay_5.jpg

Грунтоўным дапаўненнем да пісьменніцкіх знаходак з’яўляецца мастацкае афармленне кнігі. Графік Святлана Стахоўская здолела правесці герояў асобных твораў праз увесь зборнік. Складваецца ўражанне, што мастацкая інтанацыя, колеры, выбраныя мастаком, надзвычай паяднаны, кансалідаваны ў пэўнай еднасці.

Наклад “Скарбаў зямлі беларускай” – 1 100 экзэмпляраў.

Дарэчы, кнігу Лёлі Багдановіч варта было б перакласці на рускую і іншыя мовы, каб юным чытачам у розных краінах прэзентаваць Беларусь і беларусаў. Прэзентаваць праз легенды, прытчы, казкі, якія носяць выразна нацыянальны характар.

Аўтар публікацыі: Раман Сэрвач.
Крыніца: Звязда

Чытайце таксама:

Навіны

Святкуем 130-годдзе Максіма Багдановіча разам

2 Сне 2021

Набліжаецца юбілей Максіма Багдановіча – 130 гадоў з дня нараджэння. Супрацоўнікі Літаратурнага музея Максіма Багдановіча прапануюць адзначыць гэтую вялікую дату шэрагам мерапрыемстваў, на любы густ і ўзрост.

Навіны бібліятэк

Бязгучная змрочная восень: 10 кніг з лістападаўскай атмасферай

30 Ліс 2021

Восеньскія дні часам адчуваюцца вельмі доўгімі і цягучымі, але і яны падыходзяць да канца, а значыць, час закрываць восеньскі гештальт. Як? Прапануем вам кнігі – універсальнае вырашэнне ўсіх праблем, адказ на ўсе пытанні. І перад тым, як вас паглыне дух чакання Новага года, прапануем вам 10 кніг з неверагоднай восеньскай атмасферай – недзе цёмных і таямнічых, як нашы лістападаўскія артыкулы, а недзе ўтульных і душэўна цёплых, як чытальныя залы бібліятэкі.

Аўтарскі погляд

110 гадоў з дня нараджэння ветэрана Нацыянальнай бібліятэкі Беларусі Фаіны Аронаўны Мерынай

1 Сне 2021

Фаіна Аронаўна адносіцца да пляяды супрацоўнікаў Дзяржаўнай бібліятэкі БССР імя У.І. Леніна, якія стаялі ля вытокаў яе фарміравання, а таксама ўдзельнічалі ў пасляваенным аднаўленні нацыянальнай скарбніцы.

Партрэты: гісторыя бібліятэкі ў асобах

Бібліятэкарам