З 7 мая па 6 ліпеня 2009 года ў чытальнай зале аддзела рэдкіх кніг і рукапісаў Цэнтральнай навуковай бібліятэкі НАН Беларусі (6-ты паверх, пам. 601) ладзіцца юбілейная выстаўка “Навечна ў памяці народнай”, прысвечаная 65-годдзю вызвалення Беларусі ад нямецка-фашысцкіх захопнікаў.
На выстаўцы будуць прадстаўлены шматлікія дакументальныя матэрыялы з фондаў аддзела рэдкіх кніг і рукапісаў ЦНБ НАН Беларусі.
Да ўвагі наведвальнікаў прапануюцца цікавыя дакументы з асабістых архіваў пісьменнікаў і вучоных: рукапісы паэтычных і празаічных твораў ваенных гадоў, дакументы, якія сведчаць пра зверствы фашыстаў на акупаваных тэрыторыях, унікальныя выяўленчыя матэрыялы, у тым ліку карты, шматлікія фотаздымкі і многае іншае.
Экспазіцыю таксама складуць цэнтральныя перыядычныя выданні ваенных гадоў: газеты “Савецкая Беларусь”, “Звязда”, “Чырвоная змена”, франтавы, падпольны і партызанскі друк, а таксама часопісы, баявыя лісткі, лісткі-плакаты, заклікі, лістоўкі. Пэўную цікавасць выклікаюць дакументы нямецкіх акупацыйных уладаў.
У заключным раздзеле выстаўкі сабраны матэрыялы, прысвечаныя ўдзельнікам Вялікай Айчыннай вайны, чый бессмяротны подзвіг назаўсёды застанецца ў народнай памяці.
Крыніца: ЦНБ НАН Беларуси
