Вечарыну, прысвечаную памяці паэта-земляка Алеся Пісьмянкова, правялі члены народнага аматарскага аб’яднання "Літаратурная гасцёўня «Крынічка»", якое працуе пры Касцюковіцкай цэнтральнай раённай бібліятэцы імя І. Чыгрынава.
Завіталі сюды літаратары Аляксандр Бардоўскі і Васіль Ткачоў. Пачалася імпрэза са знаёмага многім голасу Алеся Пісьмянкова, які сёлета мог бы адзначыць 58-годдзе.
У выкананні навучэнцаў Бялынкавіцкай школы, дзе вучыўся творца, гучалі вершы “Нядзеля ў Бялынкавічах”, “І вёдры поўныя вады”.
Аляксандр Бардоўскі – аднавясковец і сябар Алеся Пісьмянкова, часты госць мерапрыемстваў, якія ладзіць цэнтральная бібліятэка. Мастак, кампазітар, інжынер, вынаходнік, паэт, яго вершы друкаваліся ў расійскіх, беларускіх, украінскіх газетах і часопісах.
Часты госць літаратурных імпрэз і Васіль Ткачоў, які таксама асабіста ведаў А. Пісьмянкова. Творца падзяліўся ўспамінамі пра сустрэчы з ім, пазнаёміў прысутных з новымі творамі, якія ўвайшлі ў кнігу прозы “Варона”.
Прысутныя з цікавасцю слухалі ўспаміны пра А. Пісьмянкова. Прысвечаны яму верш прадставіла член Саюза пісьменнікаў Беларусі, член народнага аматарскага аб’яднання “Літаратурная гасцёўня «Крынічка»” Наталля Азаранка.
У падарунак кніжніцы госці прывезлі свае новыя кнігі і партрэт Алеся Пісьмянкова, створаны Аляксандрам Бардоўскім. А новыя кнігі А. Бардоўскага “Выспы часу” і В. Ткачова “Варона” папоўнілі фонд краязнаўчай літаратуры.
Аўтар публікацыі: Тамара Коршунава, загадчык аддзела маркетынгу цэнтральнай бібліятэкі імя І. Чыгрынава.
Крыніца: газета “Літаратура і мастацтва”, 27.03.2015.
Чытайце таксама:
