Сёмы год запар аб’яўляецца рэспубліканскі конкурс на лепшы літаратурны твор.
Заснавальнікі – Саюз пісьменнікаў Беларусі (СПБ), міністэрствы інфармацыі, культуры і адукацыі Беларусі, а таксама Мінскі гарадскі выканаўчы камітэт.
Канчатковае рашэнне наконт пераможцаў прымае журы, аднак перад гэтым дасланыя творы разглядаюцца на саветах Мінскага гарадскога і абласных аддзяленняў СПБ, а таксама на секцыях па жанрах.
Творы праходзяць па наступных намінацыях: “Паэзія”, “Проза”, “Дзіцячая літаратура”, “Драматургія”, “Літаратурная крытыка і публіцыстыка”, “Краязнаўчая літаратура”, “Пераклад”, “Сатыра і гумар”, “Песенны жанр”. У першых трох прадугледжаны тры прызавыя месцы, у астатніх – толькі па адным.
Пераможцы, акрамя грашовай прэміі, атрымліваюць знак-зімвал “Залаты Купідон”. Чакаюць пісьменнікаў і заахвочвальныя дыпломы.
Сярод леташніх пераможцаў конкурсу – паэт Алег Салтук, празаік Мікалай Ільінскі, драматург Фёдар Палачанін; у намінацыі “Дзіцячая літаратура” першае месца заняў Мікола Маляўка, а Зіновій Прыгодзіч перамог з кнігай “Постаці” ў намінацыі “Крытыка і літаратуразнаўства”. Лепшае краязнаўчае выданне – у Анатоля Статкевіча-Чабаганава, аўтара летапісу беларускіх родаў “Я – сын ваш”, а лепшым перакладчыкам стаў Уладзімір Скарынкін – ён пераклаў на беларускую мову творы Дантэ Аліг’еры і Франчэска Пятраркі.
У песенным жанры перамог Іван Юркін. Дарэчы, дыплом атрымаў і выканаўца яго патрыятычных песень – Анатоль Ярмоленка.
Лепш за ўсё дасылаць творы ў абласныя аддзяленні СПБ альбо адразу ў Дом літаратара ў Мінску, што па адрасе Фрунзе, 5. Конкурс адкрыты, а гэта значыць, што ў ім могуць удзельнічаць усе, а не толькі сябры СПБ. Аднак сёлета ўнесена вельмі значная папраўка: прэмію нельга атрымаць двойчы. Былі выпадкі, калі адзін і той жа чалавек атрымліваў прэмію ў розных намінацыях або займаў прызавыя месцы ў адной намінацыі, але ў розныя гады.
“Гэтак будзе больш справядліва. Іначай атрымаецца замкнёнае кола”, – тлумачыць Генадзь Пашкоў. Вынікі конкурсу будуць падведзеныя летам: прыкладна ў канцы ліпеня плануецца правесці пасяджэнне аргкамітэта. Па традыцыі пераможцаў узнагародзяць на Свяце беларускага пісьменства.
Крыніца: газета “Літаратура і мастацтва”, 15.03.2013
Чытайце таксама:
