Супрацоўнікі Дзяржаўнага літаратурнага музея імя Янкі Купалы і яго чатырох філіялаў рыхтуюцца да святкавання юбілея паэта.
7 ліпеня, у дзень нараджэння класіка беларускай літаратуры Янкі Купалы, у вёсцы Пячышча, што пад Казанню, стартавала акцыя “Чытаем Купалу разам”.
Як вядома, у гэтым паселішчы беларускі Пясняр знаходзіўся падчас эвакуацыі. Тут дзейнічае музей паэта, які з’яўляецца філіялам Нацыянальнага музея Рэспублікі Татарстан. Акцыя, што распачалася 7 ліпеня, скончыцца ў 2012-м.
З пачатку гэтага года аднайменная культурна-грамадская акцыя ладзіцца і ў Дзяржаўным літаратурным музеі імя Янкі Купалы. Як мяркуецца, яна таксама завершыцца ў ліпені наступнага года.
Рыхтуюцца музейшчыкі і да 130-годдзя з дня нараджэння Янкі Купалы. Пра планы і задачы на будучыню расказала дырэктар установы Алена Мацевасян:
– Цяпер падаём канцэпцыю новай экспазіцыі на разгляд Рэспубліканскага савета па музейнай дзейнасці. У кастрычніку плануем прыступіць ужо да яе выканання. Яшчэ задача – палепшыць матэрыяльна-тэхнічную базу. Як вядома, музей наш мае чатыры філіялы, і два з іх – Ляўкі і Вязынка – чакаюць капітальныя рамонты. Сродкі на гэта прадугледжаны ў Дзяржаўнай праграме “Культура Беларусі”. Да таго ж, наш музей атрымаў грант UNESCO на выданне электроннага каталога аўтографаў класіка.
Крыніца: газета “Культура”, 16 ліпеня 2011 г.
