14 ліпеня ў Радашковічах урачыста адбыўся Купалаў фэст – 2019. Ён праходзіў пад дэвізам “Беларусь – маё сэрца, залатая краіна” . Арганізатарамі выступілі мінскі Дзяржаўны літаратурны музей Я. Купалы, які прадстаўляла спадарыня Марыя Барткова, і мясцовая каталіцкая парафія.
У касцёле Святой Тройцы ў Радашковічах хрысцілі будучага паэта. Кожны раз удзел у свяце дае выдатную магчымасць пераасэнсаваць творчасць песняра беларускай зямлі, па-новаму перачытаць яго вершы, спасцігнуць веліч яго паэтычнага дару, больш глыбокае зразумець яго паэзію. І сёлетняя імпрэза, якую ладзіў ксёндз-пробашч Юры Быкаў, высвеціла новыя грані асобы Янкі Купалы і яго творчасці.
“Зараз у летні час праходзіць шмат фэстаў, – адзначыў біскуп Юры Касабуцкі. – Мы прыехалі з розных куткоў, з Гудагая, з Тракеляў, каб яшчэ раз дакрануцца да нашай духоўнай спадчыны, перачытаць вершы Янкі Купалы і перадаць любоў да іх наступным пакаленням.
Творчасць Купалы – гэта спадчына, якая закладае фундамент нашай нацыянальнай свядомасці. Культура і вера – гэта аснова, на якой мы павінны будаваць наша жыццё. Хочацца пажадаць усім нам, каб мы чэрпалі сілы з гэтай крыніцы, чыталі, ведалі і любілі нашых беларускіх паэтаў і пісьменнікаў”.
З чытаннем вершаў выступілі святары, парафіяне, вучні Радашковіцкай школы. Прагучалі творы “Хрыстос уваскрос!”, “Свайму народу”, “Мая навука”, “А хто там ідзе?”, “Летняя раса” і інш. Унучка Якуба Коласа спадарыня Марыя Міцкевіч прачытала яго твор.
“Сёлетні фэст па змесце больш звязаны з краінай. Залатой краіну робяць душы людзей, а не толькі эканоміка, таму мы павінны быць людзьмі моцнай веры і моцнай духоўнасці, – адзначыў ксёндз Юры Быкаў. – Янка Купала паказвае нам шлях, які спалучае з яго творы з Бібліяй.”
З лірычнай канцэртнай праграмай выступілі Алесь Камоцкі і Алеся Сівохіна. А пасля адбыўся невялічкі спартовы турнір па гульні мёлькю.
Старшыня Магілёўскай філіі ТБМ Алег Дзьячкоў прапанаваў сваім сябрам змястоўную вандроўку па ваколіцах Радашковічаў. Бо нямала вядомых імёнаў звязана з гэтым багатым на гістарычныя падзеі куточкам Міншчыны, дзе зліваюцца ў адну плынь рачулкі: Вязынка, Гуйка і Рыбчанка.
Пры панскай Польшчы населены пункт выконваў ролю памежнага горада і быў трэцім па значэнні пасля Вільні і Мінска цэнтрам беларускага нацыянальнага адраджэння. Тут у 1921–1928 гадах пры падтрымцы вядомага палітычнага дзеяча і літаратара Аляксандра Уласава працавала беларуская гімназія імя Францыска Скарыны, у якой вучыўся будучы народны паэт Беларусі Максім Танк і некаторы час выкладаў мастак Язэп Драздовіч.
У Радашковічах у 1891–1897 гадах жыў і працаваў памочнікам аптэкара адзін з пачынальнікаў беларускай мастацкай прозы –Ядвігін Ш (Антон Іванавіч Лявіцкі). Тут ён стаў сябрам гуртка мясцовай інтэлігенцыі, браў удзел у літаратурных вечарынах. А пазней у мястэчку працаваў пісарам у судовага следчага і Янка Купала.
Аўтар публікацыі: Эла Дзвінская, фота аўтара.
Матэрыял падрыхтаваны аддзелам суправаджэння інтэрнэт-партала.
