У Галандыі, у прыгарадзе Ратэрдама Спэйкэнісе, адкрылася новая бібліятэка Book Mountain + Library Quarter. Адметнай яе робіць незвычайная форма – шкляная піраміда.
За шклом
Плошча піраміды Book Mountain + Library Quarter – прыкладна 93 тысячы квадратных метраў. Знешняя частка яе складаецца з паўпразрыстага шкла, з усталяваным падсвятленнем.
Унутры піраміды знаходзіцца яшчэ адна – вялізная кніжная шафа – прыступкамі. Уздоўж усіх кніжных стэлажоў пралягае дарожка, агульная даўжыня якой – 470 метраў. І ўжо на даху гэтай шафы – кавярня, дзе можна падсілкавацца ды пачытаць упадабаную кнігу.
Па агульных падліках, бібліятэка сабрала больш як 70 тысяч кніг. Стварыла гэты цуд студыя MVRDV, а размясцілася піраміда на Базарнай плошчы.
Між тым, Book Mountain + Library Quarter не толькі бібліятэка. Гэта цэлы комплекс збудаванняў, звязаных паміж сабой. Тут і адукацыйны экалагічны цэнтр, і канферэнц-залы, і вучэбныя аўдыторыі, і офісы, і гандлёвыя плошчы, і гатэль, і нават сацыяльнае жытло (42 кватэры).
Так, архітэктурную навінку Спэйкэнісе ўжо назвалі кніжным кварталам.
Сапраўды, гэтую мясціну можна лічыць зямным раем бібліяфілаў.
Гіганцкія паліцы, куб і сутарэнне
Натуральна, гэта не адзіная незвычайная бібліятэка ў свеце. Рэгулярна з’яўляюцца спісы самых дзіўных / прыгожых / выродлівых кніжніц.
І кожны раз у гэтыя спісы трапляе публічная бібліятэка Канзас-Сіці (ЗША) – у станоўчым святле. Гісторыя ў яе цікавая: кніжніца дзесяць гадоў таму была перанесена ў будынак, перад якім неўзабаве з’явілася паркоўка. Каб прыўкрасіць непрыгляднае, улады горада вырашылі збудаваць сцяну ў выглядзе гіганцкай кніжнай паліцы. Вышыня яе – восем метраў, шырыня – два. На паліцы суседнічаюць “Прыгоды Гекльберы Фіна” Твэна, “Уладар пярсцёнкаў” Толкіена, “100 гадоў адзіноты” Маркеса, “Рамэа і Джульета” Шэкспіра – усяго 22 вялікія ва ўсіх сэнсах творы.
Не менш прыцягальная бібліятэка Parque Espana (Калумбія), што мае выгляд вялізных валуноў – ці нават кавалкаў скалы. Збудаваная яна ў 2007 годзе па праекце Джанкарла Мазанці. Унутры непрыступнай з выгляду кніжніцы – культурны цэнтр, шматлікія чытальныя залы і камп’ютарныя класы.
А бібліятэка Луі Нюсэра (Францыя) увогуле ўяўляе сабой скульптуру: гіганцкая галава, заключаная ў кубе. Аднак патрапіць туды могуць толькі супрацоўнікі кніжніцы, бо тут адміністрацыйныя памяшканні. Бібліятэчны фонд і чытальныя залы месцяцца побач, у традыцыйным будынку.
Калі наведаеце Італію, у прыватнасці горад Перуджа, не прамініце паглядзець на кніжны НЛА. Бібліятэка імя Сандра Пены мае форму лятучай талеркі з ружовымі празрыстымі сценамі. Акрамя таго, у будынку змешваюцца натуральнае і штучнае асвятленне, залы – гукаізаляваныя, а сама бібліятэка працуе круглыя суткі.
Фантастыка!..
Кніжніцу Дэлфцкага тэхнічнага ўніверсітэта (зноў Галандыя) трэба яшчэ пашукаць. Справа ў тым, што месціцца яна пад зямлёй. Дакладней, яе дах і сцены закамуфляваныя пад пагорак, парослы сакавітай зелянінаю, на якой адпачываюць змучаныя навукай студэнты. У кніжніцы, якая прыйшлася б даспадобы хобітам, знаходзяцца бібліятэчны фонд, чытальныя залы, універсітэцкае выдавецтва, пераплётны аддзел і кнігарня.
Сярод іншых вылучаецца адна кітайская кніжніца: драўляная крэпасць-храм знаходзіцца ў вёсцы Хуайжоў і збудавана са шкла і 45 тысяч драўляных прутоў. Унутры вы не ўбачыце ні сталоў, ні крэслаў; замест іх – шматузроўневыя тэрасы з убудаванымі кніжнымі паліцамі. Тут жа ляжаць цыноўкі, на якіх і чытаюць наведнікі кніжніцы. Будынак не электрыфікаваны, таму асвятленне выключна натуральнае – дах празрысты. Нядзіўна, што працуе кніжніца толькі да 16.30.
І як не згадаць галоўную – прынамсі, ідэйна – бібліятэку свету – Александрыйскую. Дакладней, Александрыну – адноўленую версію той, што была знішчана амаль дзве тысячы гадоў таму. Будынак месціцца ўнутры басейна і выкананы ў форме дыска, што адсылае да старажытнаегіпецкага бога Сонца Ра. Калі новая галандская кніжніца празваная кніжным кварталам, то Александрына – бібліятэчны Сусвет, які змяшчае восем мільёнаў кніг. На сценах бібліятэкі высечаныя графічныя сістэмы са 120 моўных сістэм свету. Гэты архітэктурны шэдэўр егіпецкія бібліятэкары ахоўвалі падчас рэвалюцыі 2011 года: яны сталі жывой заслонай вакол будынка і адбівалі атакі марадзёраў.
Дарэчы, і наша Нацыянальная бібліятэка, апісваць якую няма патрэбы, не раз трапляла ў спісы самых незвычайных кніжніц свету.
Аўтар публікацыі: Наста Грышчук.
Крыніца: газета “Літаратура і мастацтва”, 23.10.2015.
Чытайце таксама:
- Библиотека на пустынном берегу
- Национальная библиотека в Сечжоне
- Национальная библиотека Беларуси в списке из 28 красивейших библиотек мира
- Первая публичная библиотека в Ираке
- Библиотека будущего в Штутгарте
- Новая библиотека в Норвегии
- Вертикальный сад украсил здание канадской библиотеки
- Культурный центр в Баку от Захи Хадид
- Библиотека «Книжная гора»
- Креативная библиотека в Бриксене (Италия)
- Здание библиотеки будет построено в форме стопки книг
- Публичная библиотека Канзас-Сити (штат Миссури, США)
- Библиотека Йельского университета
- Библиотека Бранденбургского технического университета
- Библиотека Villanueva в Казанаре
- Библиотека Parque Espana в Медельине
- Библиотека из пивных ящиков в Магдебурге
- Старинные библиотеки Европы