З 21 па 24 мая ў горадзе на Няве адбыўся Х Міжнародны кніжны салон, ганаровым госцем якога з’яўлялася Рэспубліка Беларусь.
Вітаючы яго ўдзельнікаў, губернатар Санкт-Пецярбурга Георгій Палтаўчанка назваў гэты горад духоўнай сталіцай Расіі, дзе былі створаны многія вобразы і сімвалы духоўнага і культурнага жыцця Расіі і СССР. Сярод тых, хто вітаў удзельнікаў салона, – старшыня заканадаўчага сходу Санкт-Пецярбурга Вячаслаў Макараў, намеснік кіраўніка Федэральнага агенцтва па друку і масавых камунікацыях Уладзімір Грыгор’еў, прэзідэнт Расійскага кніжнага саюза Сяргей Сцяпашын, старшыня Цэнтрвыбаркама Расіі Уладзімір Чураў.
Прывітанне ўдзельнікам Х Санкт-Пецярбургскага міжнароднага кніжнага салона ад Прэзідэнта Беларусі Аляксандра Лукашэнкі зачытаў старшыня Саюза пісьменнікаў Беларусі Мікалай Чаргінец. “Мудрае слова пісьменніка заўсёды было носьбітам сапраўдных каштоўнасцей, крытэрыем духоўна-маральнага развіцця грамадства, – гаворыцца ў прывітанні. – Няхай 70-годдзе Вялікай Перамогі стане сімвалічнай згадкай пра тое, як важна, каб літаратурныя творы адлюстроўвалі імкненне людзей да міру, вучылі маладое пакаленне патрыятызму і адказнасці за лёс краіны. Духоўная і культурная роднасць народаў Беларусі і Расіі ва ўсе часы была сапраўднай асновай нашага супрацоўніцтва. Усведамленне сваёй далучанасці да агульных каштоўнасцей, традыцый і ідэалаў дае нам магчымасць заўсёды знаходзіць шляхі да ўзаемаразумення і згоды”.
Дэлегацыя Беларусі прымае актыўны ўдзел у многіх канферэнцыях, сустрэчах з чытачамі і прэзентацыях кніг. Асаблівае месца ў рабоце кніжнага форуму займае пленарнае пасяджэнне “Вялікая Перамога вялікай літаратуры”. Само правядзенне гэтага мерапрыемства сведчыць пра тое, што асноўная ідэя – ідэя перамогі справядлівасці і міру – павінна быць пранесена праз гады новымі пакаленнямі, незалежна ад таго, у якой краіне яны жывуць.
Беларусь прадставіла на салоне і “Блакадную кнігу” Алеся Адамовіча і Данііла Граніна, выпушчаную ў выдавецтве “Мастацкая літаратура”. Гэтае выданне – агульны духоўны набытак Беларусі і Расіі, сумленнае слова пра драматычныя падзеі Вялікай Айчыннай вайны. З хваляваннем удзельнікі адкрыцця салона выслухалі відэазварот да ўсіх, хто цэніць кнігу, вялікага рускага пісьменніка, пісьменніка-франтавіка Данііла Граніна. Яго перакананасць, што духоўнае развіццё свету немагчыма без кнігі, і ёсць настрой самога свята мастацкага слова ў Санкт-Пецярбургу.
Аўтар публікацыі: Кірыл Ладуцька, Санкт-Пецярбург.
Крыніца: газета “Звязда”
Чытайце таксама:
- IX Санкт-Петербургский книжный салон: ставка на праздник
- VІІІ Санкт-Петербургский международный книжный салон
- VII Санкт-Петербургский международный книжный салон
- VI Санкт-Петербургский международный книжный салон
- V Санкт-Петербургский международный книжный салон
- IV Санкт-Петербургский международный книжный салон
- III Санкт-Петербургский международный книжный салон
