Манументальныя драўляныя скульптуры ў выглядзе міфічных казачных персанажаў у хуткім часе ўпрыгожаць вуліцы Заслаўя. Іх вырабілі спецыяльна да Дня беларускага пісьменства, які будзе праходзіць тут 6–7 верасня.
Пасля святочных падзей наваствораныя мастацкія вырабы атрымаюць сталую “прапіску” і застануцца ў гэтым горадзе назаўсёды.
Паўдзельнічаць у пленэры ў Заслаўі былі запрошаны разьбяры з розных куткоў нашай краіны. Творчы дэсант мастакоў узначаліў нарачанец Юрась Камандзірчык. Побач з ім шчыравалі іншыя вопытныя скульптары з Мінска, Гомеля, Капыля, Нясвіжа, Слуцка, Мядзела, вёскі Дзераўное Стаўбцоўскага раёна.
Большасць скульптур размесцяць у дзіцячым скверы ў старажытнай частцы горада. Кампазіцыю па матывах казкі Уладзіміра Караткевіча “Чортаў скарб” (аўтар Юрась Камандзірчык), а таксама малую архітэктурную форму “Крумкач” (зроблена Аляксандрам Жураўлевічам) пакінуць на тэрыторыі этнаграфічнага комплексу “Млын”, дзе ладзіўся пленэр, каля старадаўняга млына. А вось постаць каваля (аўтар Алег Шапель) упрыгожыць падворак кузні этнаграфічнага комплексу.
Супольную працу скульптараў размесцяць побач з адным з найлепшых мясцовых сельскіх дамоў культуры – у вёсцы Пятрышкі, што непадалёк ад Заслаўя.
Сюжэты ўсіх твораў узяты з беларускіх народных казак і паданняў. Тут можна ўбачыць чорта, што лезе праз комін, лесуна, цмока, русалку і многіх іншых.
Крыніца: газета “Звязда”
Чытайце таксама:
