ГалоўнаяНавіныНавіны бібліятэк
Дзіцячы пакой запрашае на творчыя заняткі
Альпенская шляхта

Каласкі ад Коласа

Каласкі ад Коласа
Іншыя навіны

Скарбонка памяці паэта папоўнілася новымі аўтографамі і архіўнымі дакументамі. Гэта былі падарункі, з якімі прыходзілі госці на 55-годдзе музея Якуба Коласа.


Унучка сябра пісьменніка па Нясвіжскай семінарыі, якая жыве ў Грузіі, напрыклад, прывезла кніжку з аўтографам Коласа. Зборнікі архіўных дакументаў з Расіі таксама могуць быць цікавымі для даследчыкаў творчасці пісьменніка, якія перыядычна збіраюцца на “Каласавіны” пад кіраўніцтвам акадэміка Міхася Мушынскага. Але падарункаў было шмат: дзень нараджэння музея – цудоўны момант для папаўнення фонду, які налічвае 34 тысячы прадметаў. І гэта момант для сустрэч, якімі славіўся дом Коласа яшчэ пры жыцці яго гаспадара: тут збіралася творчая інтэлігенцыя, ладзіліся вечарыны. Усіх прымалі з душой.

Са сцюдзёнай вуліцы заходзіш у дом – і адразу цяпло ахінае. У чацвер вечарам віталі ў доме Коласа з музыкай і каласкамі. Маленькі сімвалічны букецік каласочкаў з сіняй стужачкай. Пазначылі: гэта свае, святочныя людзі. Сапраўды, на 55-ты дзень нараджэння Дзяржаўнага літаратурна-мемарыяльнага музея Якуба Коласа прыходзілі тыя, хто меў дачыненне да арганізацыі музея (у першую чаргу гэта прадстаўнікі сям’і пісьменніка), хто працаваў у ім і хто працуе сёння і дапамагае музею як сябар.

У гэтым доме Якуб Колас жыў з 1944 па 1956 год. Тут ён памёр 13 жніўня 1956 года. А ўжо 16 жніўня выйшла пастанова ЦК КПБ і Савета Міністраў БССР аб стварэнні музея ў доме, дзе жыў Якуб Колас. Гэта стала магчыма ў першую чаргу дзякуючы рашэнню сыноў пісьменніка – Данілы і Міхася Міцкевічаў. Менавіта Даніла Міцкевіч знайшоў гэты дом для бацькі пасля вызвалення Мінска і заняў яго з дазволу кіраўніцтва Акадэміі навук БССР. Сам Колас прыехаў у сталіцу ўпершыню пасля вызвалення 6 снежня 1944 года, але канчаткова пераехаў з Масквы ў маі 1945 года пасля смерці жонкі Марыі Дзмітрыеўны.

Даніла Канстанцінавіч быў вельмі актыўным рупліўцам захавання памяці пра свайго бацьку і заснавальнікам музея, а Міхась Канстанцінавіч дагэтуль жыве зусім побач і актыўна прымае ўдзел ва ўсіх музейных імпрэзах і наогул тых, якія ладзяцца ў гонар пісьменніка.

Сёння музей Коласа сучасны, напоўнены тэхнікай, якая дапамагае зразумець сутнасць творчасці народнага паэта. Тут нават гукі ствараюцца такія, каб была асаблівая атмасфера, нібыта ходзіш па жывым будынку, які дыхае. Ходзіш і ўяўляеш, што вось жа Пясняр, побач. Насамрэч часткова такое адчуванне ўтвараецца з-за таго, што ў доме захаваны інтэр’ер, рэчы гаспадара. Усё, чым ён карыстаўся, – ложак яго, стол, крэслы, нават посуд (нібыта чакаюць гасцей).

Гасцей насамрэч чакаюць ва ўсіх філіялах музея Якуба Коласа: у Акінчыцах, Альбуці, Ластку, Смольні. І калі праехаць па тых мясцінах, дзе паэт нарадзіўся і сталеў, а потым завітаць у дом Коласа ў Мінску, то можна атрымаць больш поўнае ўяўленне пра чалавека і асобу, у якой у жыцці было столькі клопату пра іншых, дзеля каго ён пісаў, сядзеў у турмах, мысліў і рабіў канкрэтныя справы, каб дапамагчы людзям, калі меў такую магчымасць. Ён заўсёды быў рад, калі прыходзілі да яго.

Прыходзяць і цяпер. На дзень нараджэння музея сабралася вялікая грамада – прадстаўнікі Міністэрства культуры, навукоўцы, пісьменнікі, мастакі, музейныя работнікі, музыканты, прадстаўнікі яго малой радзімы, людзі, якія працуюць на зямлі. А ўсіх аб’яднаў творца, які пісаў пра нешта такое, што агульнае для ўсіх, што робіць нас усіх народам.

Аўтар публікацыі: Ларыса Цімошык.

Крыніца: газета “Звязда”

Чытайце таксама:

Навіны

30 Ліп 2021

Мы так часта ўжываем слова “культура”, што іншым разам не задумваемся над глыбінным сэнсам паняцця. І дарэмна. Напэўна, у гэтым прычына не надта вялікай чысціні нашых ліфтаў і душ. А таксама – не вельмі добрага ведання роднай гісторыі ды імя продка ў пятым калене. А сапраўды, што за паняцце такое – культура?

Навіны бібліятэк

Выставачна-асветніцкае мерапрыемства, прысвечанае 200-годдзю з дня нараджэння Ф.М. Дастаеўскага

27 Ліп 2021

27 ліпеня ў Нацыянальнай бібліятэцы адбылося пленарнае пасяджэнне выставачна-асветніцкага мерапрыемства, прысвечанага 200-годдзю з дня нараджэння Ф.М. Дастаеўскага, і адкрыццё фотавыставы “Пецярбург Дастаеўскага”.

Навіны Нацыянальнай бібліятэкі Беларусі

Мой чытацкі спіс: навошта ім дзяліцца і ў чым наогул сэнс

28 Ліп 2021

У эпоху Інтэрнэту ўсё наша жыццё навідавоку. Фотаздымкі з паездак, душэўныя пасты ў сацсетках, нататкі пра хобі і любімыя фільмы хутка становяцца здабыткам грамадскасці – і нават чытанне. Што прымушае нас весці свае чытацкія дзённікі? Пахвальба, жаданне самасцвердзіцца ці проста прага да самавыяўлення? Давайце разбірацца – у спісах, кнігах і саміх сабе.

Аўтарскі погляд

“Ян Баршчэўскі, які любіў Бога, прыроду і людзей” – выстава ў музеі кнігі (+відэа)

23 Ліп 2021

22 ліпеня ў музеі кнігі Нацыянальнай бібліятэкі Беларусі адбылося адкрыццё выставы “Ян Баршчэўскі, які любіў Бога, прыроду і людзей”, на якой упершыню дэманструюцца разам аўтэнтычныя сведчанні пра знакамітага пісьменніка, аднаго з пачынальнікаў новай беларускай літаратуры.

Навіны Нацыянальнай бібліятэкі Беларусі

Бібліятэкарам