Прэзентацыя дзіцячай кнігі Наталлі Голубевай “Казкі цётачкі Руф” прайшла ў “Доме Масквы” ў рамках святкавання 1023-й гадавіны Хрышчэння Русі.
Вось ужо чатыры гады па ініцыятыве і з блаславення Свяцейшага Патрыярха Маскоўскага і ўсяе Русі Алексія II і Блажэннейшага Мітрапаліта Кіеўскага і ўсяе Украіны Уладзіміра праваслаўны люд урачыста адзначае Дзень Хрышчэння Русі. Ён стаў дзяржаўным святам у Расіі і ва Украіне.
У гэтым годзе да святкавання далучылася і Беларусь. З блаславення Мітрапаліта Мінскага і Слуцкага, Патрыяршага Экзарха ўсяе Беларусі Філарэта ў Дзень Хрышчэння Русі прайшлі ўрачыстыя мерапрыемствы ў культурна-дзелавым цэнтры “Дом Масквы” ў Мінску.
Арганізатарамі свята выступілі Мінская епархія Беларускага Экзархата, прадстаўніцтва дзяржаўнай аўтаномнай установы Масквы “Дом Масквы” і Беларускі рэспубліканскі саюз моладзі. Праграма свята арганічна была падзелена на тры часткі: знаёмства з мастацкай выстаўкай, канцэрт і прэзентацыя кнігі.
Выстаўка твораў члена Беларускага саюза мастакоў Галіны Бараноўскай-Плонікавай сустракала гасцей свята ў фае. Пейзажы, выкананыя ў тэхніцы акварэлі і алоўкавага малюнка, выклікалі замілаванне і захапленне, бо зроблены яны былі пераважна ў святых месцах Расіі, Украіны, Беларусі.
Канцэрт, распачаты відэазваротам Свяцейшага Патрыярха Маскоўскага і ўсяе Русі Кірыла і вітальным словам Уладыкі Філарэта, быў яркім і разнастайным: народная і класічная музыка, самадзейныя калектывы і выканаўцы, а таксама прафесіяналы Беларускай дзяржаўнай філармоніі, Дзяржаўнай акадэмічнай харавой капэлы імя Р. Шырмы, айчыннай эстрады.
У зале ў той дзень прысутнічалі таксама дзеці і маладыя людзі з абмежаванымі магчымасцямі. Менавіта іх вырашыла зрабіць першымі чытачамі сваёй першай дзіцячай кнігі “Казкі цётачкі Руф” вядомая пісьменніца Наталля Голубева. Расказаўшы пра тое, як з’явілася задума напісаць казкі з беларускім гістарычным антуражам, аўтарка запрасіла ўсіх жадаючых у падарожжа па дарогах казкі. А пасля дзеці-інваліды атрымалі ад пісьменніцы ў падарунак па кніжцы. І ў кожнай з іх – найлепшыя яе пажаданні і асабісты подпіс Уладыкі Філарэта.
“Я ўдзячная Уладыку за тое, што ён зразумеў мае імкненні і падтрымаў іх, – сказала Наталля Аляксандраўна. – Нягледзячы на сваю вялікую занятасць, ён палічыў неабходным вылучыць час, каб падпісаць кожны экзэмпляр, які сёння быў падараваны дзецям! Усе мы ў душы застаемся дзецьмі і ўсе жадаем, каб казка адбылася. І трэба, кааб мары нашы збываліся”.
Крыніца: газета “Літаратура і мастацтва”, 05.08.2011