25 чэрвеня 2009 года ў Магілёўскай абласной бібліятэцы імя У.І. Леніна адбылася прэзентацыя фотавыстаўкі "Іх подзвіг жывы, непаўторны і вечны", прысвечанай 65-годдзю вызвалення Беларусі і Магілёўшчыны ад нямецка-фашысцкіх захопнікаў.
Праект быў падрыхтаваны пры актыўным удзеле Магілёўскага абласнога краязнаўчага музея імя Е. Раманава, які прадаставіў для выстаўкі значную колькасць фотадакументаў са сваіх фондаў.
Мы шмат ведаем пра вайну з кніг, архіўных матэрыялаў, успамінаў удзельнікаў Вялікай Айчыннай вайны. Але найбольш моцнае эмацыянальнае ўражанне на чалавека робяць фотаздымкі таго часу. Старонкі вызвалення Магілёўшчыны вачыма ваенных фотакарэспандэнтаў С. Гурарыя, П. Бернштэйна, В. Шароўскага, Б. Яраслаўцава даюць магчымасць нам, сённяшняму пакаленню, уявіць святочныя і трагічныя імгненні гэтых падзей.
Сярод прадстаўленных фотадакументаў – "Фарсіраванне р. Днепр каля Магілёва", "У Магілёве ў дзень вызвалення", "Часткі Чырвонай Арміі ўступаюць у Магілёў", "Савецкія танкі на вуліцах вызваленага Магілёва", "Група савецкіх салдат з жыхарамі Магілёва", "Від на Магілёў пасля вызвалення. Аэраздымка", "Першамайская дэманстрацыя ў Магілёве ў першыя пасляваенныя гады".
На прэзентацыі выступілі ўдзельнік Вялікай Айчыннай вайны палкоўнік у адстаўцы Пётр Віктаравіч Асмалоўскі, старшы навуковы супрацоўнік Магілёўскага абласнога краязнаўчага музея імя Е. Раманава Людміла Фёдараўна Кандрацьева, кандыдат гістарычных навук Ігар Аляксандравіч Пушкін, якія падзяліліся сваімі ўражаннямі ад фотавыстаўкі і падкрэслілі, што яна з’яўляецца данінай памяці і ўдзячнасці пакаленню пераможцаў, якія выстаялі і далі магчымасць будучым пакаленням жыць пад мірным небам.
Крыніца: Магілёўская абласная бібліятэка імя У.І. Леніна