Кніжныя навінкі, прысвечаныя старадаўняй Беларусі, і чарговыя тамы са Збору твораў Якуба Коласа прапануе выдавецтва “Беларуская навука” чытачам.
У іх раскрываюцца малавядомыя факты з нашай гістарычнай мінуўшчыны, мастацкія і іншыя вартасці рарытэтных помнікаў старадаўняй беларускай літаратуры, на падставе дакументальных і іншых матэрыялаў высвечваюцца розныя бакі жыццядзейнасці вядомых гістарычных асоб. Гэта наступныя выданні: Конан У. М. “Гісторыя эстэтычнай думкі Беларусі “ (у 3 т. Т. 1. Х ст. – 1905 г.), “Беларуская літаратура X–XV стст.”, Мяцельскі А. А. “Мсціслаўскае княства і ваяводства ў ХІІ–ХVIII стст.”, “Марцінкевіч герба Лебедзь: дакументы і матэрыялы пра класіка беларускай літаратуры XIX ст. Вінцэнта Дуніна-Марцінкевіча”. Больш падрабязна са зместам выданняў можна пазнаёміцца ў рубрыцы “Кніжны калейдаскоп”.
Дваццацітомны Збор твораў Якуба Коласа папоўніўся дзесятым, адзінаццатым і дванаццатым тамамі, якія прадстаўляюць такія вядомыя творы класіка беларускай літаратуры, як “Рыбакова хата”, “Дрыгва”, “На прасторах жыцця” і інш.
