З‘явілася новая мода на выданне краязнаўчых ілюстрацыйных даведнікаў.
У Мінску выйшаў невялічкі альбом “Гісторыя Слоніма на старых фотаздымках і паштоўках (1900–1950)”. Аўтар тэксту – Сяргей Чыгрын, вядомы на Гродзеншчыне і ў Беларусі краязнаўца. Выдаў два, а можа, і больш дзясяткаў кніг пра Слонім, Гродзеншчыну. Новае выданне – збор рэпрадукцый са старых паштовак і фотаздымкаў.
"Слонім… даўно мог бы стаць турыстычнай Меккай, куды едуць падыхаць паветрам даўніны, пахадзіць па старых вуліцах і завулках, дзе некалі хадзілі славутыя Сапегі, Агінскія, Пуслоўскія, Слізні, дзе да сённяшніх дзён клічуць сваіх вернікаў касцёл святога Андрэя (1775), кляштар бернардзінак (1664) і кляштар бернардзінцаў (1630), а таксама адбудаваны ў цэнтры горада прыгожы Спаса-Праабражэнскі сабор…” – піша ва ўступным слове ўлюбёны ў родны горад Сяргей Чыгрын.
Па фотазборы, прадстаўленым у альбоме, можна вывучаць гісторыю не толькі Слоніма, але і ўсяе Беларусі. Настолькі адрасна, цікава выяўляюць здымкі самыя розныя часы і падзеі. А колькі людзей сабрана ў ілюстрацыйных шэрагах!.. Пажарныя, вайскоўцы, медыкі, проста жыхары горада першай паловы XX стагоддзя… Шкада, што альбом убачыў свет тыражом толькі 300 экзэмпляраў. Каб ведалі сланімчане з усяго свету, з усяе Беларусі пра такое выданне, то, несумненна, набылі б яго для сваёй хатняй бібліятэкі – як альбом душэўнай памяці пра родны горад.
Варта зазначыць: у апошнія некалькі гадоў выйшлі кнігі падобнага кшталту, якія вяртаюць да жыцця не толькі старыя паштоўкі, але і старыя фотаздымкі і прысвечаны самым розным гарадам – Мінску, Брэсту, Пінску і іншым.
Аўтар публікацыі: Мікола Берлеж.
Крыніца: газета “Звязда”