Чацвёрты, красавіцкі, нумар "Маладосці" абяцае быць фантастычным ва ўсіх сэнсах. І сярод яго аўтараў-дэбютантаў – супрацоўніца Нацыянальнай бібліятэкі Беларусі Уладзіслава Гурыновіч.
Стваральнікі часопіса працягваюць эксперыментаваць, выпускаючы тэматычныя нумары. На гэты раз “Маладосць” будзе прысвечана ці не самаму папулярнаму і запатрабаванаму сярод сучасных чытачоў: літаратуры фэнтэзі, фантастыцы і рознага кшталту жахам ды містыцы. Ідэя стварыць падобны выпуск не ўзнікла на пустым месцы. Красавіцкі нумар – гэта даніна колішнім традыцыям “Маладосці”: памятаеце, пад адной вокладкай з ёю гадоў дзесяць таму выходзіў так званы часопіс у часопісе “Фантаст”? З размовы пра гэты праект з тагачасным рэдактарам “Маладосці” пісьменніцай Раісай Баравіковай і пачынаецца незвычайны красавіцкі нумар.
Калі фантастыка навуковая, то яна ўжо не зусім і фантастыка. Гэта інтуітыўна-мастацкае бачанне будучыні, якое звычайна апярэджвае навуку і мае тэндэнцыю спраўджвацца. Аднак сучасная навука настолькі развітая, што некаторыя яе дасягненні здаюцца фантастычнымі. Што казаць, калі нават школьнікі здзяйсняюць дзёрзкія навуковыя вынаходствы? Прыклад вы пабачыце ў красавіцкай “Маладосці”. Пацікаўцеся, як вучань старадарожскай школы, удзельнік спецпраекта БРСМ “100 ідэй для Беларусі” Павел Бацылеў навучыў мабільнік рашаць задачкі па хіміі.
Мастацкая частка жахліва-фантастычнай красавіцкай “Маладосці”, несумненна, уразіць чытачоў разгулам фантазіі аўтараў. Аматарам жахаў паказычуць нервы творы аўтараў-дэбютантаў Уладзіславы Гурыновіч (“Паляндра”), Данііла Жугжды (“Эглея”) і Кацярыны Мядзведзевай (“Спадарыня Трынога”). У аповесці Сяргея Белаяра “Гульня” вусцішныя фантастычныя падзеі ўпісаны ў гістарычны кантэкст вайны 1812 г. Не абышоўся фантастычны маладосцеўскі эксперымент і без касмічнай тэмы. Павандраваць па галактыках вас запрашаюць аўтары Маргарыта Латышкевіч ды Лаўрэн Юрага. Адпачыць ад звышразумнасці касмічных твораў і развеяць нервовае напружанне ад жахаў вам дапаможа іранічна-пазітыўны “Лятучы клегіум” Віктара Лупасіна.
Паэзія чацвёртай “Маладосці” арганічна ўпісалася ў агульную канцэпцыю нумара. Нягледзячы на тое, што фантастыка і жахі – тэрыторыя, як правіла, прозы, “Маладосць” прадстаўляе ўзоры фантастычна-жахлівай лірыкі: выпадак, калі таямнічы змест заключаны ў чароўную паэтычную форму. Прачытайце вершы Маргарыты Латышкевіч, Юліі Анацкі, Касі Глухоўскай, Адама Шостака і зведайце сапраўдную магію слова…
Чацвёртая “Маладосць” гатовая пазнаёміць чытачоў таксама з замежным фантастычным вопытам: творамі Джэніфер Гізбрэхт і Бруса Холанда Роджэрса ў перакладзе на беларускую мову.
Пра, бадай, самага вядомага беларускага міфалагічнага персанажа, Цмока, вы зможаце прачытаць у займальным артыкуле Пятра Васючэнкі “Пра Цмока , яго постаць, дзікасць, паляванне на яго ды пра іншае”.
Разбірацца, чаму ж чалавека так вабіць жахлівае і фантастычнае, было б несправядліва без псіхолагаў. Пра тое, чаму нам недастаткова жыццёвай рэальнасці і як навучыцца чараўніцтву ў штодзённасці, чытайце ў артыкуле Святланы Сітнік у рубрыцы “Кампетэнтна”.
І апошняе. Як можна беларусам абысціся без Язэпа Драздовіча, калі гаворка ідзе пра фантастыку? Нельга. І гэта відаць ужо па вокладцы чацвёртай “Маладосці”…
Прыемнага вам чытання, сябры! Будзьце маладымі і фантастычнымі!
Аўтар публікацыі: Тамара Сарачынская.
Крыніца: газета “Звязда”
Чытайце таксама: