21 снежня адбудзецца прэзентацыя новай кнігі папулярнага шведскага аўтара Свэна Нурдквіста “Калядная каша” ў перакладзе на беларускую мову.
Імпрэза пройдзе ў фармаце вясёлага свята для дзетак і іх бацькоў.
У Швецыі на Каляды дзеці чакаюць Каляднага Гнома і гатуюць яму адмысловую калядную кашу з рысу і малака. Але гномы, як і Дзяды Маразы, бываюць сапраўднымі і не.
Сапраўдных гномаў ніхто не бачыць, але менавіта яны дапамагаюць людзям і ведаюць пра іх усё. Кожныя Каляды гномы вельмі чакаюць свайго каляднага пачастунку. Што можа здарыцца, калі людзі забываюць пачаставаць гномаў каляднай кашай, вы даведаецеся з кнігі Свэна Нурдквіста “Калядная каша”.
Урывак з кнігі прачытае і заспявае свае песні для дзетак Зміцер Вайцюшкевіч. Будзем разам частавацца сапраўднай шведскай каляднай кашай, піць какаву, слухаць казку і забаўляцца.
Перакладчыца гэтай і іншых сучасных шведскіх дзіцячых кніг Надзея Кандрусевіч распавядзе пра сваю працу і адкажа на пытанні.
На мерапрыемстве таксама будзе прадстаўлены зборнік аўдыякніг па творах Свэна Нурдквіста “Пэтсан і Фіндус” на трох CD – усе гісторыі вядомага шведскага аўтара (9 кніг) пра прыгоды старога Пэтсана і ягонага катка Фіндуса ў агучцы па-беларуску Ганны Хітрык і Паўла Харланчука.Імпрэза адбудзецца 21 снежня (чацвер) а 17-й гадзіне ў кавярні “Грай” (вул. Інтэрнацыянальная, 33).
Уваход вольны!
Крыніца: Новы час
