Міністры замежных спраў Беларусі і Латвіі прынялі ўдзел у праекце Дзяржаўнага літаратурнага музея Янкі Купалы “У дыялогу культур”, прысвечаным Міжнароднаму дню роднай мовы.
У мерапрыемстве ўдзельнічалі кіраўнікі і прадстаўнікі 20 пасольстваў, акрэдытаваных у Мінску, якія чыталі вершы на родных мовах.
Міністр замежных спраў Латвіі Эдгарс Рынкевічс распавёў пра тое, што культура з’яўляецца тым вельмі важным элементам, які звязвае Беларусь і Латвію. Нагадаў пра сяброўства Янкі Купалы з латвійскім паэтам Янам Райнісам, 150-годдзе з дня нараджэння якога адзначаецца ў 2015 годзе.
На думку Уладзіміра Макея, Янка Купала – адзін з лепшых прадстаўнікоў беларускага народа, які вучыў, як трэба любіць, абараняць, умацоўваць і шанаваць сваю Бацькаўшчыну. “Сёння можна сказаць, што мара беларускага песняра пачала здзяйсняцца – беларускі народ мае сваю дзяржаву і ганарыцца сваёй Радзімай», – заўважыў беларускі міністр. Кіраўнік знешнепалітычнага ведамства Беларусі прачытаў верш Янкі Купалы “Бацькаўшчына”.
Уладзімір Макей дамовіўся з кіраўніцтвам музея аб сумесным правядзенні праекта “У дыялогу культур” у 2016 годзе.
Дарэчы, гэта не адзіны сумесны праект музея і Міністэрства замежных спраў Беларусі. 4 сакавіка адбудзецца ўрачыстае адкрыццё выстаўкі жывапісу і графікі беларускіх мастакоў “Янка Купала: клічу вас я на пабеду”.
Крыніца: газета “Звязда”
