У перыяд з 24 верасня па 30 кастрычніка ў Літоўскай Рэспубліцы пройдуць Дні культуры Рэспублікі Беларусь.
Праграма Дзён культуры Беларусі ў Літве насычаная і шматжанравая. Беларускую культуру ў Літве будзе прадстаўляць самая вялікая за ўсю гісторыю беларуска-літоўскіх адносін культурная дэлегацыя колькасцю больш за 650 чалавек. Беларускія дзеячы мастацтва прадэманструюць лепшыя ўзоры беларускага сімфанічнага, балетнага, драматычнага і музычнага мастацтва і фальклору.
Міністр культуры Беларусі Павел Латушка прыняў ўдзел ва ўрачыстым адкрыцці Дзён культуры, якое ладзілася 24 верасня ў Літоўскай нацыянальнай філармоніі выступленнем Дзяржаўнага акадэмічнага сімфанічнага аркестра Рэспублікі Беларусь пад кіраўніцтвам народнага артыста Беларусі Аляксандра Анісімава. Пад час паездкі запланавана правядзенне сустрэч з кіраўніцтвам Міністэрства культуры Літвы, кіраўнікамі беларускіх грамадскіх арганізацый у Літве, а таксама рэктаратам Вільнюскага ўніверсітэта эдукалогіі, у якім дзейнічае Цэнтр беларускай мовы, літаратуры і этнакультуры.
У рамках святкавання юбілею Янкі Купалы, жыццё і творчасць якога цесна звязана з літоўскай сталіцай, у публічнай бібліятэцы Адама Міцкевіча ў Вільнюсе праходзіць выстаўка з фондаў Дзяржаўнага літаратурнага музея Янкі Купалы “Не згаснуць зоркі ў небе”, у адкрыцці якой браў удзел Павел Латушка.
На працягу верасня і кастрычніка ў розных гарадах Літвы – Вільнюсе, Каўнасе, Вісагінасе і Анікшчаі – адбудуцца выступленні Нацыянальнага акадэмічнага Вялікага тэатра оперы і балета Рэспублікі Беларусь, Дзяржаўнага акадэмічнага сімфанічнага аркестра Рэспублікі Беларусь, Беларускага дзяржаўнага акадэмічнага музычнага тэатра, Магілёўскага абласнога драматычнага тэатра, Тэатра-студыі кінаакцёра, фальклорнай групы “Купалінка”.
Дні культуры Рэспублікі Беларусь у Літоўскай Рэспублікі завершацца 30 кастрычніка 2012 года паказам балета “Бахчысарайскі фантан” Нацыянальнага акадэмічнага Вялікага тэатра оперы і балета Рэспублікі Беларусь.