24 чэрвеня спаўняецца 110 гадоў з дня нараджэння класіка беларускай літаратуры, празаіка, публіцыста, драматурга Кузьмы Чорнага.
Кузьма Чорны (Мікалай Карлавіч Раманоўскі, 1900–1944 ) – адзін з самых яркіх і таленавітых мастакоў слова, выдатны апавядальнік, раманіст, тонкі псіхолаг. Яго спадчына мела надзвычайны ўплыў на развіццё нацыянальнай мастацкай свядомасці. З імем Кузьмы Чорнага звязаны фундаментальныя здабыткі беларускай прозы 1920–1930-х гадоў і перыяду Вялікай Айчыннай вайны.
Творы пісьменніка даюць выразны і дакладны мастацкі партрэт беларуса XX стагоддзя. Кузьма Чорны – пісьменнік высокай філасофска-эстэтычнай культуры, які шматгранна адлюстраваў важныя, паваротныя моманты жыцця свайго народа, стварыў яркія, запамінальныя ў сваёй адметнай індывідуалізацыі і тыпізацыі характары.
Пісьменнік тонкай і пранікнёнай даследчыцкай думкі, выдатны знаўца чалавечай душы, стваральнік сацыяльна-псіхалагічнага рамана, Кузьма Чорны надаў беларускай прозе шырокае эпічнае гучанне і адкрыў новую эстэтычную і чалавеказнаўчую старонку ў гісторыі беларускай літаратуры. Ён узвёў нацыянальную прозу да маштабных, сусветнага гучання мастацка-вобразных адкрыццяў і з поўным правам можа быць пастаўлены ў літаратурна-дыялагічную сувязь з такімі знакамітымі пісьменнікамі, як Дастаеўскі, Камю, Фолкнер.
З 22 па 30 чэрвеня ў Цэнтральнай навуковай бібліятэцы імя Я. Коласа НАН Беларусі дэманструецца выстаўка “110 год з дня нараджэння Кузьмы Чорнага”. На ёй прадстаўлены творы пісьменніка, а таксама літаратура пра яго жыццёвы і творчы шлях.
У рамках праекта “Чалавек нараджаецца, каб жыць…” да 110-годдзя з дня нараджэння К.Чорнага ў Дзяржаўным музеі гісторыі беларускай літаратуры былі запланаваны наступныя мерапрыемствы:
- конкурс дзіцячай творчасці школьнікаў г. Капыля, прысвечаны юбілею пісьменніка (красавік–май);
- вечар памяці ў музеі (5 мая), дзе быў прадстаўлены сямейны архіў пісьменніка перыяду Вялікай Айчыннай вайны, адбылася прэзентацыя запісу яго голасу, сустрэча з навукоўцамі, даследчыкамі творчасці К. Чорнага і яго роднымі;
- літаратурнага свята (19 чэрвеня) на радзіме пісьменніка ў Літаратурным музеі К. Чорнага;
- фотапленэр у мясцінах, звязаных з жыццём і творчасцю К. Чорнага, па выніках якога плануюцца выстаўкі ў Мінску, Капылі і Нясвіжы.
Да 110-годдзя Кузьмы Чорнага Цэнтральнай раённай бібліятэкай імя Анатоля Астрэйкі г. Капыля падрыхтаваны інфармацыйны краязнаўчы даведнік “Магутны талент”.
У зборнік увайшла інфармацыя пра жыццё і творчасць Кузьмы Чорнага, спіс яго твораў і спіс літаратуры аб ім. У даведніку змешчаны сцэнарый літаратурнай кампазіцыі “Святло яго таленту”. Выданне будзе цікавым настаўнікам, вучням, аматарам беларускай літаратуры, краязнаўцам.