Цытаты з несмяротнай “Паўлінкі” Янкі Купалы размясціў замест афіш Нацыянальны акадэмічны тэатр імя Я. Купалы ў падземным пераходзе ст. м. “Кастрычніцкая”.
На выхадзе да Дома афіцэраў красуюцца жыццесцвярджальныя цытаты: “Бывайце здаровенькія”, “Тудэма-сюдэма... І мы вернемся!”, “Дзве дзюркі ў носе і сканчылося!”, “Чым хата багата – тым і рада!”, “Бо калі ўсё пайшло ўверх нагамі, хутка стане на свае месцы!”, “А мае вы родненькія, падтрымаем адзін аднаго” і іншыя.
“Паўлінка” лічыцца візітнай карткай Купалаўскага і адкрывае кожны сезон. Спектакль застаецца неад’емнай часткай рэпертуару вось ужо амаль 80 гадоў. Быў пастаўлены паводле п’есы Я. Купалы рэжысёрам Львом Літвінавым яшчэ ў 1944 годзе на базе Томскага драматычнага тэатра ва ўмовах эвакуацыі. У 2019-м “Паўлінка” прызнана нематэрыяльнай гісторыка-культурнай каштоўнасцю Беларусі.
Купалаўскі тэатр часова зачынены для гледачоў. Ён адным з першых запусціў анлайн-трансляцыі спектакляў. Таксама акцёры праводзяць анлайн-чытанні твораў беларускіх і замежных аўтараў. У самім тэатры пакуль шыюць маскі.
Крыніца: Новы час