Канадская пісьменніца Маргарэт Этвуд зноў стала лаўрэатам Букераўскай прэміі, але на гэты раз званне найлепшага англамоўнага пісьменніка яна падзяліла з брытанкай Бернардыні Эварыста.
Прызначэнне адразу двух лаўрэатаў з’яўляецца парушэннем правілаў прысуджэння Букера, у якіх прапісана, што прэмія непадзельная, але журы прызнаецца, што проста не змагло выбраць лепшы з двух твораў.
Эствуд адзначана за раман “Запаветы” (The Testaments), які з’яўляецца сіквелам аднаго з самых вядомых яе твораў “Аповед служанкі”. У “Запаветах” дзеянне адбываецца праз 15 гадоў пасля падзей, апісаных у папярэдняй кнізе.
Падзеі разгортваюцца ў патрыярхальна-таталітарнай дзяржаве Рэспубліка Гілеад, дзе суровыя законы грамадства пазбаўляюць жанчын якіх-небудзь правоў, пакідаючы ім толькі функцыю нараджэння дзяцей.
Эварыста ўзнагароджаная за раман “Дзяўчына, жанчына, усё астатняе” (Girl, Woman, Other), у якім аўтар распавядае гісторыі жыцця 12 персанажаў, большасць з якіх – чарнаскурыя брытанкі.
Кожнаму персанажу прысвечаны раздзел, іх шляхі мудрагелістым чынам пераплятаюцца, нягледзячы на зусім розныя біяграфіі і асяроддзе.
Аўтары падзеляць галоўную прэмію ў 50 тысяч фунтаў стэрлінгаў, і абедзве ўвойдуць у гісторыю прэміі: 79-гадовая Этвуд як самы сталы лаўрэат у гісторыі, а Эварыста – як першая чарнаскурая пісьменніца, уганараваная Букерам.
Крыніца: Наша ніва
