Рэспубліка Беларусь традыцыйна прымае ўдзел у міжнародным Вільнюскім кніжным кірмашы. Маштабна яна была прадстаўлена і на XV кірмашы, які доўжыўся ў Літоўскім выставачным і кангрэс-цэнтры LІTEXPO чатыры дні.
Сёлета Беларусь прадстаўлялі дзесяць устаноў: Выдавецкі дом “Звязда”, выдавецтвы “Мастацкая літаратура”, “Адукацыя і выхаванне”, “Вышэйшая школа”, “Беларусь”, “Пачатковая школа”, “Белкніга”, абласныя аддзяленні “Саюздруку” Гродна, Віцебска і Брэста.
У цырымоніі адкрыцця беларускага стэнда прынялі ўдзел Надзвычайны і Паўнамоцны Пасол Беларусі ў Літве Аляксандр Кароль, намеснік начальніка ўпраўлення выдавецкай дзейнасці і гандлю Міністэрства інфармацыі Беларусі Таццяна Бунос, дырэктары беларускіх выдавецтваў.
Нацыянальны стэнд Беларусі наведаў і прэм’ер-міністр Літвы Альгірдас Буткявічус. Ён з цікавасцю знаёміўся з экспазіцыяй, гутарыў з беларускімі кнігавыдаўцамі.
На беларускім стэндзе экспанаваліся кніжныя навінкі мастацкай, навукова-папулярнай, дзіцячай, вучэбнай, даведачнай літаратуры. Асаблівае месца адведзена тэматыцы чэмпіянату свету па хакеі 2014 года ў Мінску.
Многія наведвальнікі пазнаёміліся з такімі дыхтоўна выдадзенымі кнігамі, як “Шлях да Бацькаўшчыны” (Напалеон Орда), “Главная улица Минска” (Леанід Маракоў), “Беларусь у асобах” (Валянціна Стэльмах), “Золотые правила народной культуры” (Янка Крук, Аксана Катовіч), “Ваньковічы”, “Белорусская свадьба” і іншыя.
У рамках выстаўкі беларуская дэлегацыя правяла шэраг прэзентацый кніжных навінак. Цікава прайшлі рэпрэзентацыі кнігі “Маці-Зямля”, аўдыякніжак “Сучасная беларуская проза”, “Сучасная беларуская паэзія”, даведніка “Приглашаем в Беларусь. Welcome to Belarus”, выпуск якога прымеркаваны да Года гасціннасці ў Беларусі.
Мне, як літоўцу, было радасна бачыць і кнігі маіх калег, вядомых журналістаў і пісьменнікаў Літвы, перакладзеныя на беларускую мову. Вітаўтас Бараўскас прадставіў сваю кнігу для дзяцей “Зіхаціць на небе сонца”, Яронімас Лаўцюс – “Развітваюся з дэпрэсіяй”, “Пішу, таму што баліць” і іншыя (усяго 6 кніг).
Акрамя Беларусі, на кірмашы сваю кніжную прадукцыю і пісьменнікаў прадставілі Расія, Латвія, Польшча, Чэхія, Германія, Швецыя, Францыя, іншыя краіны.
Аўтар публікацыі: Вітаўтас Жэймантас.
Крыніца: газета “Звязда”
Чытайце таксама:
- Вильнюсская международная книжная ярмарка
- XIV Международная книжная выставка в Вильнюсе
- Белорусские издатели привезли в Вильнюс новинки
- Беларусь примет участие в XIII Вильнюсской МКЯ
- Уникальное издание о Радзивиллах представят на Вильнюсской книжной ярмарке
- Вильнюсская книжная ярмарка ждет гостей из 8 стран
- Президент Литвы отметила высокое качество белорусских изданий
- Лучшие белорусские издания представлены в Вильнюсе