23–25 лістапада ў г. Барысаве і Барысаўскім раёне адбудуцца памятныя мерапрыемствы з нагоды 200-годдзя вайны 1812 года.
Праграмай памятных мерапрыемстваў прадугледжаны набажэнствы ў памяць загінуўшых у вайне 1812 года, правядзенне IV Міжнароднай канферэнцыі "Каладзееўскія чытанні", урачыстае адкрыццё дома І.Х. Каладзеева, адкрыццё памятнага знака "Смутак і пакланенне" на Брылёўскім полі, наведванне новай экспазіцыі, прысвечанай вайне 1812 года, у Барысаўскім аб’яднаным музеі.
Цэнтральныя мерапрыемствы адбудуцца 24 лістапада 2012 г. на Брылёўскім полі і пачнуцца з міжнароднага мітынгу-рэквіема, у якім прымуць удзел члены арганізацыйнага камітэта для падрыхтоўкі і правядзення памятных мерапрыемстваў з нагоды 200-годдзя вайны 1812 года, прадстаўнікі дзяржаўных органаў і арганізацый, дыпламатычных прадстаўніцтваў замежных дзяржаў у Рэспубліцы Беларусь.
Удзельнікамі мерапрыемства стануць нашчадкі Напалеона Банапарта – Шарль Напалеон, генерал-лейтэнанта Карла Шыльдэра – Кацярына Абасава-Шыльдэр, генерала Аляксандра Сіславіна – Андрэй Жураўлёў-Сіславін, генерал-лейтэнанта Пятра Карнілава – Галіна Карнілава, прадстаўнікі Таварыства нашчадкаў удзельнікаў Айчыннай вайны 1812 года (Расійская Федэрацыя).
Па заканчэнні міжнароднага мітынгу-рэквіема адбудзецца паказальнае выступленне ўдзельнікаў ваенна-гістарычных клубаў з Польшчы, Расіі, Францыі, Швейцарыі з элементамі рэканструкцыі гістарычных падзей на рацэ Бярэзіне.
Крыніца: Міністэрства культуры Рэспублікі Беларусь
Нацыянальнай бібліятэкай Беларусі да юбілею знакавай гістарычнай падзеі падрыхтаваны віртуальны праект “1812 год в истории Беларуси”, у адным з раздзелаў якога як унікальная калекцыя рэліквій вайны 1812 г. прадстаўлены электронныя копіі кніг з бібліятэкі І.Х. Каладзеева.