Беларусь, як краіна – удзельніца Еўрапейскай культурнай канвенцыі, далучылася да Інфармацыйнай сістэмы культурнай палітыкі Савета Еўропы “Кампендыум”.
Адпаведная дамоўленасць падпісана паміж Міністэрствам культуры Рэспублікі Беларусь і Генеральным дырэктаратам па пытаннях дэмакратыі Савета Еўропы.
Дамоўленасць вызначае дзеянні беларускага боку і Савета Еўропы па падрыхтоўцы інфармацыі аб стане і развіцці сферы культуры Беларусі для яе наступнага размяшчэння ў інфармацыйнай сістэме “Кампендыум”.
Кампендыум культурнай палітыкі і тэндэнцый яе развіцця ў Еўропе з’яўляецца транснацыянальным інтэрнэт-праектам, ініцыяваным у 1998 годзе кіруючым камітэтам па культуры Савета Еўропы. Ён ажыццяўляецца сумесна з Еўрапейскім інстытутам параўнальнай культуралогіі (ERICarts) і прадстаўляе культурную палітыку еўрапейскіх краін, яе тэндэнцыі, інструменты, а таксама звязаныя з ёй грамадскія дыскусіі.