З 12 па 22 жніўня ў ЦНБ імя Я. Коласа НАН Беларусі дэманструецца выстаўка “75 год з дня нараджэння вядомага беларускага моваведа, акадэміка НАН Беларусі Аляксандра Іосіфавіча Падлужнага”.
Аляксандр Іосіфавіч Падлужны (16.08.1935 – 21.11.2005) – заслужаны дзеяч навукі Беларусі, доктар філалагічных навук, прафесар, акадэмік. Яго жыццё і дзейнасць былі неразрыўна звязаны з Інстытутам мовазнаўства імя Якуба Коласа НАН Беларусі, дзе ён прайшоў шлях ад малодшага навуковага супрацоўніка да акадэміка, дырэктара гэтай установы.
А.І. Падлужны – найбуйнейшы спецыяліст у галіне сучаснай беларускай мовы. Аўтар больш 150 навуковых прац, у тым ліку 16 манаграфій па розных праблемах беларускай фанетыкі, фаналогіі, сучаснай беларускай лексікалогіі, граматыкі, правапісу і культуры мовы, моўнай палітыкі. Ён па праву лічыцца заснавальнікам беларускай фанетычнай школы.
Асабістай заслугай вучонага з’явілася стварэнне ў Інстытуце мовазнаўства лабараторыі эксперыментальнай фанетыкі, у якой пад яго кіраўніцтвам і пры непасрэдным удзеле праведзены даследаванні па сучаснай вуснай беларускай мове.
Вынікі навуковых дасягненняў вядомага лінгвіста абагульнены ў найбольш значных манаграфіях і кнігах: “Фаналагічная сістэма беларускай літаратурнай мовы” (1969), “Нарыс акустычнай фанетыкі беларускай мовы” (1977), “Гукі беларускай мовы” (1973, у сааўт.), “ Беларуская мова. Цяжкія выпадкі фанетыкі, арфаграфіі, граматыкі” (1987), “Мова і грамадства” (1997) і іншых. Навуковая дзейнасць А.І. Падлужнага шырокавядома і за межамі нашай краіны.
На выстаўцы прадстаўлены навуковыя працы (у тым ліку манаграфіі), вучэбныя дапаможнікі, даведачная літаратура, часопісы, а таксама літаратура пра жыццёвы шлях мовазнаўца.
Крыніца: Цэнтральная навуковая бібліятэка імя Я. Коласа НАН Беларусі