23 красавіка ў музеі “Беларуская хатка” адбудзецца ўрачыстае адкрыццё часовай літаратурна-дакументальнай экспазіцыі “На струнах душы”.
Выстава прымеркавана да 135-годдзя з дня нараджэння класіка беларускай літаратуры Змітрака Бядулі (Самуіла Яфімавіча Плаўніка). Шматгранны талент генія раскрываецца праз экспанаты выставы. Паэт, які першым стаў пісаць “белыя вершы” і верлібры, чые паэтычныя творы ўзгадаваныя на беларускай глебе, напітаныя фальклорна-міфалагічнымі крыніцамі, напоўненыя любоўю да роднай зямлі і беларускага народа. Празаік, які стварыў запамінальныя вобразы ў лірычных імпрэсіях, апавяданнях, аповесцях. Драматург, сцэнічнае ўвасабленне твораў якога ўражвае сваёй яскравасцю і глыбінёй. Дзіцячы пісьменнік, што знайшоў воклік у душы кожнага дзіцяці. Змітрок Бядуля – рэдактар, публіцыст, крытык, перакладчык. Яго неацэнная літаратурная спадчына захоўваецца ў фондах розных музеяў. Але зараз з’явілася магчымасць пазнаёміцца з рукапіснымі аўтографамі яго твораў, фотаздымкамі, дакументамі, эпісталярыямі. Выстава разгарнецца ў доме, дзе з канца 1915 па 1919 год жыў Змітрок Бядуля, а цяпер знаходзіцца музей “Беларуская хатка”.
Экспанаванне працягнецца з 23 красавіка па 31 жніўня 2021 года.
Кантактны тэлефон: (8 017) 375 52 13.
Крыніца: Дзяржаўны музей гісторыі беларускай літаратуры
