Па традыцыі Магілёў зноў сабраў пісьменнікаў, краязнаўцаў, вучоных, моладзь і проста тых, каму цікавыя творчасць і лёс Канстанціна Сіманава.
На працягу двух дзён у абласным цэнтры праходзілі мерапрыемствы, прысвечаныя гэтаму пісьменніку і журналісту. Сёлета споўнілася 100 гадоў з яго нараджэння.
Для Магілёва ён, лічы, родны чалавек. У сваіх дзённіках Канстанцін Міхайлавіч пісаў: “Пачатак будучага разгрому немцаў пад Масквой быў пакладзены ў ліпеньскіх баях 41-га пад Магілёвам”. Аўтар часта прыязджаў у горад на Дняпры, бываў на месцах былых баёў, сустракаўся з іх удзельнікамі. Пасля смерці Сіманава ў жніўні 1979-га ў афіцыйным некралогу значылася, што пахаванне адбудзецца на Новадзявочых могілках. Але ён сам выбраў сабе месца, пакінуўшы завяшчанне развеяць яго прах на тым самым полі мужнасці, адкуль ён пісаў свае рэпартажы аб першых перамогах Чырвонай Арміі. “Сіманаўскі камень” з’явіўся на полі праз год з невялікім пасля смерці пісьменніка. Прыдатны валун выбралі пад Мінскам, а Алесь Адамовіч пасадзейнічаў дастаўцы яго ў Магілёў.
Імем Сіманава ў Магілёве названая вуліца, а яго жыццю і творчасці прысвечаны музейныя экспазіцыі ў тэхналагічным і агралесатэхнічным каледжах. З 2005 года Магілёўскае гарадское аддзяленне “Рускага таварыства” пры падтрымцы ўлад і грамадскасці аднавіла міжнародныя Сіманаўскія чытанні. Іх мэта – прыцягнуць увагу моладзі да літаратурнай спадчыны пісьменніка.
Чарговыя чытанні прайшлі ў Магілёве 27–28 лістапада пры падтрымцы аблвыканкама і расійскага пасольства ў Беларусі. Як расказала старшыня гарадскога аддзялення РГА “Рускае таварыства” Алена Апідовіч, у МДУ імя Куляшова адбыўся круглы стол і былі падведзены вынікі літаратурнага конкурсу, прысвечанага 100-годдзю з дня нараджэння Канстанціна Сіманава і 70-годдзю Вялікай Перамогі. У абласной бібліятэцы імя Леніна прайшла сустрэча магіляўчан з пісьменнікамі, журналістамі, ветэранамі Вялікай Айчыннай вайны, гасцямі са Смаленска, Мінска, Гродна, Гомеля. Удзельнікі чытанняў аддалі даніну памяці абаронцам горада на Буйніцкім полі, пра мужнасць і адвагу якіх у ліпені 1941-га першым напісаў ваенны карэспандэнт Канстанцін Сіманаў у артыкуле “Горячий день”. А ў кінатэатры “Радзіма” паказалі літаратурна-музычную кампазіцыю “Шчыра ваш Сіманаў”.
Аўтар публікацыі: Нэлі Зігуля.
Крыніца: газета “Звязда”
Чытайце таксама:
- К. Симонов. Человек и время
- Сын Константина Симонова рассказал о своем отце
- Фронтовые письма Симонова издадут отдельной книгой
- Литературный конкурс памяти Константина Симонова
- Певец величия народного подвига
- Писатель огненных лет
- В едином поэтическом кругу
- Симоновские чтения проходят в Могилёве
- Породненные кровью
- Симоновские чтения пройдут в Могилёве
- Симонов. Могилёв. Вечность…
