16 снежня музыка Зміцер Вайцюшкевіч наведаў “Клуб кніжных прафесараў”. У музеі кнігі сярод рукапісаў і старадрукаў дзеткі спявалі і танчылі. Кожны ўдзельнік атрымаў аўтограф ад знакамітага госця.
Спявак, музыка і кампазітар Зміцер Вайцюшкевіч – стваральнік песенных цыклаў на вершы Уладзіміра Караткевіча, Рыгора Барадуліна, Генадзя Бураўкіна, Леаніда Дранько-Майсюка, Алеся Камоцкага і іншых беларускіх паэтаў.
Шмат песень з рэпертуару спевака адрасуецца дзецям. Сярод альбомаў, якія ім палюбіліся, – “Цацачная крама” (2001), “Калыханкі” (2007), “Мой сябра анёлак” (2009), “Малы і Мядзведзік” і “Малы і Білан” (2011).
Сёлета выйшаў новы альбом – “На Каляды”. Да аднайменнай песні створаны кліп, дзе па заснежаных вуліцах гуляе коцік і прыглядаецца да святочнага жыцця людзей. Раздрукаваныя выявы з кліпа з аўтографамі музыкі сталі памятным падарункам для удзельнікаў сустрэчы.
У музеі кнігі дзеткі спявалі разам са Змітром добра вядомыя і новыя песні. Мерапрыемства было арганізавана ў межах праекта “У госці да кніг”.
Мадэратар – Таццяна Сапега, загадчык сектара навукова-праектнай работы навукова-даследчага аддзела кнігазнаўства.
Гуказапісы твораў Змітра Вайцюшкевіча можна заказаць праз электронны каталог Нацыянальнай бібліятэкі, праслухаць і нават захаваць на ўласны электронны носьбіт.
Матэрыял прадастаўлены навукова-даследчым аддзелам кнігазнаўства.
Чытайце таксама:
Зміцер Вайцюшкевіч – госць “Клуба кніжных прафесараў”
