4 верасня ў бібліятэцы ў рамках святкавання 1020-годдзя Хрышчэння Русі і Дня беларускага пісьменства адбылася прэс-канферэнцыя, прысвечаная паспяховаму завяршэнню сумеснага праекта Нацыянальнай бібліятэкі Беларусі і прадпрыемства “Брытыш-Амерыкан Табака Трэйдынг компані” па выпуску тыражу CD-ROM “Слуцкае Евангелле – беларускі рукапіс XVI ст.” і перадачы ў дар калекцыі старадрукаваных кніг XVII–XVIII стст.
Арганізатарамі мерапрыемства выступілі Нацыянальная бібліятэка Беларусі і “Брытыш-Амерыкан Табака Трэйдынг компані”.
Выданне CD-ROM “Слуцкае Евангелле – беларускі рукапіс XVI ст.” – вынік сумеснага навуковага праекта Нацыянальнай бібліятэкі Беларусі і Інстытута мовазнаўства і літаратуразнаўства імя Я. Купалы і Я. Коласа НАН Беларусі па даследаванні, уводзінах у навуковае абарачэнне і забеспячэнні шырокага доступу да адной з нацыянальных праваслаўных святынь Беларусі. Алічбоўка рукапісу, які захоўваецца ў Беларускім экзархаце, была ажыццёўлена па блаславенні Патрыяршага Экзарха ўсяе Беларусі, Мітрапаліта Мінскага і Слуцкага Філарэта. Навуковы праект быў выкананы пры фінансавай падтрымцы Беларускага рэспубліканскага фонду фундаментальных даследаванняў НАН Беларусі. Тыраж выйшаў пры фінансавай падтрымцы “Брытыш-Амерыкан Табака Трэйдынг компані”.
У прэс-канферэнцыі прынялі ўдзел начальнік упраўлення ўстаноў культуры і народнай творчасці Міністэрства культуры Рэспублікі Беларусь В.М. Чэрнік, дырэктар Інстытута мовы і літаратуры імя Я. Коласа і Я. Купалы НАН Беларусі, прафесар, доктар філалагічных навук А.А. Лукашанец, клірык мінскага Свята-Духавага кафедральнага сабора айцец Аляксандр Шымбалёў, дырэктар Нацыянальнай бібліятэкі Беларусі, прафесар, доктар педагагічных навук Р.С. Матульскі, намеснік дырэктара па навуковай рабоце і сувязях з грамадскасцю Л.Г. Кірухіна і начальнік аддзела па карпаратыўных сувязях “Брытыш-Амерыкан Табака Трэйдынг компані” С.М. Буры.