“І дзякуй скажа родны край!” Гэтымі словамі Янкі Купалы віртуальная чытальная зала зноў звяртае ўвагу сваіх чытачоў і карыстальнікаў на рэсурсы малой, але вельмі дарагой сэрцу чалавека радзімы, прапаноўваючы здзейсніць амаль “кругасветнае” інтэрнэт-падарожжа па сёлах, гарадах і раёнах Магілёўскай вобласці.
Паўнатэкставая база даных “Край мой – Магілёўшчына” даступная з віртуальнай чытальнай залы па спасылцы, размешчанай на старонцы “Электронныя інфармацыйныя рэсурсы. Рэсурсы арганізацый – партнёраў Нацыянальнай бібліятэкі Беларусі”.
Адсюль можна пачаць больш блізкае знаёмства з гісторыяй, культурай, прамысловасцю, сельскай і іншымі галінамі гаспадаркі кожнага з раёнаў і гарадоў краю, параўноўваючы мінулае з сённяшнім днём. Правесці гістарычныя і генеалагічныя пошукі, даследаванні ў галіне мастацтва і культуры, эканомікі і прамысловасці, палітыкі і адміністрацыйнага ладу кожнага раёна Магілёўскай вобласці – усё гэта магчыма ў базе даных.
Віртуальная чытальная зала з асаблівай увагай прадстаўляе гэты шматаспектны і дынамічны рэсурс. Матэрыялы да яго былі карпатліва сабраны і падрыхтаваны супрацоўнікамі цэнтральных раённых і гарадскіх бібліятэк вобласці. Раздзелы базы пастаянна дапаўняюцца звесткамі аб знакамітых людзях, аб'ектах адукацыі, культуры, эканомікі, прамысловасці.
Рэсурс будзе цікавы тым, хто ў сувязі з V Форумам рэгіёнаў Беларусі і Расіі хоча віртуальна наведаць прымеркаваныя да яго мерапрыемствы (у Горках, Шклове і Магілёве), глыбей даведацца пра рэгіён, яго асаблівасці, перспектывы развіцця і супрацоўніцтва.
І вядома, у Год малой радзімы віртуальная чытальная зала зноў нагадвае: з гэтага пункту доступу вы трапіце на цікавыя і разнастайныя краязнаўчыя рэсурсы Беларусі, якія раскрываюць розныя аспекты жыцця краіны і яе жыхароў.
Запрашаем у падарожжа!
