Нацыянальная бібліятэка Беларусі рыхтуе да выхаду ў свет 9-ты выпуск штогадовага навукова-практычнага зборніка з працягам “Бібліятэчны веснік”.
Зборнік “Бібліятэчны веснік”, заснаваны ў 2009 г., з’яўляецца шматпрофільным навуковым выданнем Нацыянальнай бібліятэкі Беларусі, змешчаным у Пераліку навуковых выданняў Рэспублікі Беларусь для апублікавання вынікаў дысертацыйных даследаванняў па педагагічных, гістарычных навуках і культуралогіі.
Запрашаем да супрацоўніцтва спецыялістаў у галіне бібліятэчнай справы і інфармацыйных тэхналогій, выкладчыкаў, аспірантаў і магістрантаў, кіраўнікоў органаў упраўлення культуры.
Да публікацыі ў зборніку прымаюцца артыкулы, прысвечаныя пытанням фарміравання сучаснай бібліятэчна-інфармацыйнай прасторы, гісторыі, сучаснаму стану і перспектывам развіцця бібліятэк, якія маюць навуковы характар і вылучаюцца навізной прадстаўленых у іх навуковых рэзультатаў.
У выданні будуць разгледжаны праблемы тэорыі і практыкі бібліятэчнай і кніжнай справы: заканадаўчай і нарматыўна-рэгламентуючай базы бібліятэчнай дзейнасці, фарміравання інфармацыйных рэсурсаў і асаблівасцей захавання фондаў, арганізацыі інфармацыйна-бібліятэчнага і сацыякультурнага абслугоўвання карыстальнікаў, прымянення сучасных тэхналогій у стварэнні інфармацыйнай прадукцыі, арганізацыі, правядзення і каардынацыі навуковых даследаванняў, прафесіяналізацыі бібліятэчных кадраў і г.д.
Заяўку на ўдзел у зборніку і рукапіс артыкула неабходна да 1 мая 2017 г. выслаць на адрас рэдкалегіі (e-mail: m_pshibytko@nlb.by, sociolog@nlb.by).
Заяўка павінна змяшчаць звесткі пра аўтара: прозвішча, імя, імя па бацьку, месца працы, пасаду, навуковую ступень і званне, кантактны тэлефон, e-mail.
Аб’ём артыкула – да 6-ці поўных старонак фармату А4, надрукаваных праз 1 інтэрвал, шрыфтам Times New Roman, кеглем 14 пт. Рабочыя мовы – беларуская, руская. Артыкул афармляецца ў адпаведнасці з Інструкцыяй па афармленні дысертацыі, аўтарэферата і публікацый па тэме дысертацыі (у рэдакцыі пастановы Вышэйшай атэстацыйнай камісіі Рэспублікі Беларусь № 4 ад 15.08.2007). Спіс выкарыстаных крыніц афармляецца ў адпаведнасці з ДАСТ 7.1–2003 “Бібліяграфічны запіс. Бібліяграфічнае апісанне”, размяшчаецца ў канцы тэксту, спасылкі нумаруюцца паводле парадку цытавання ў тэксце, парадкавыя нумары спасылак паказваюцца ўнутры квадратных дужак (напрыклад: [1, з. 23], [2]).
Да артыкула прыкладаецца анатацыя на рускай і англійскай мовах аб’ёмам не больш за 100–150 слоў. Ілюстрацыі дасылаюцца ў фарматах tiff, jpeg, gif, bmp, png з разрашэннем 300 dpi.
Рэдакцыйны савет Нацыянальнай бібліятэкі Беларусі пакідае за сабой права адбору матэрыялаў для апублікавання. Пры неабходнасці артыкул можа быць вернуты аўтарам на дапрацоўку, датай паступлення артыкула ў рэдкалегію лічыцца дзень атрымання канчатковага яго варыянта.
Палажэнне аб навукова-практычным зборніку “Бібліятэчны веснік”
Адрас:
Нацыянальная бібліятэка Беларусі,
навукова-даследчы аддзел бібліятэказнаўства,
прасп. Незалежнасці, 116,
220114, г. Мінск, Рэспубліка Беларусь.
Кантактны тэлефон:
(8 017) 293 27 61 (Пшыбытка Марына Георгіеўна, загадчык навукова-даследчага аддзела бібліятэказнаўства).
E-mail:
m_pshibytko@nlb.by
sociolog@nlb.by